KOHHRAN RELTU

HEBRAI 12:14
Mi zawng zawng nêna inremna leh thianghlimna ûm rawh u; chumi tel lo chuan tû man Lalpa an hmu thei lo vang.

Charles Spurgeon-an heti hian a sawi: American tlangval fel tak hian a ṭhian hnênah chuan, “I remchan hunah ka huanah rawn lêng ta che. Ka apple rah tui tak hi rawn tem chhin la,” a ti a.

Vawi tam tak chutianga a sâwm hnu pawh chuan a ṭhianpa chuan uksak duh lovin a lêng duh lo a. A tâwp a tâwpah chuan, “Ṭhiana, ka huana i lo kal duh loh chhan hi ka apple rah a tui i rin loh vâng a ni ang tiraw?” a ti a. A ṭhianpa chuan, “Ni e, dik taka sawi chuan, i apple rah te chu ka tem tawh a lawm. Vawi tam tak i huan bul kawngah ka kaltlang tawh a. Kawng sîra a rah lo tla ka chhar tawh a, ka ei chhin a, ka piana hnulamah hetianga thei rah thûr leh tui lo hi ka la ei ngai lo a ni. Chuvangin i apple hi ei leh ka tum tawh ngai lo.” tiin a chhâng a ni.

Tlangval chuan, “A ni maw, a dik khawp ang. A chhan chu hmun hla takah kalin apple rah thûr ber ka hmuh theih 50 lai ka lei a, ka huan bul kawng kam vêlah chuan ka dah hlawm a. A chhan chu naupangin ka huana apple tui tak an rûk loh nân a ni. Kawnga apple tla, thûr leh tui lo tak an ei chuan a chhûnga apple kha an ru tawh dawn lo a ni. Mahse ka huan chhûngah rawn lût teh, ka apple rah nalh tak leh tui tak hi rawn ei teh, khawvêla i thei ei tui ber a ni ngei ang,” a ti a.

Kohhran pawh hi member ṭhenkhat avânga kan sawisêl a, kan inkhâwm peih loh phah a, kan ngaihsak loh mai chuan kan tisual dâwn a ni. Kohhran belh a, a chhûnga Pathian hmangaihna zâr zo a, tuinung lui luang chu tlân a, thlamuanna leh lâwmna awm changtute chu an inchhir ngai lo vang.

ROM 12:18 – Nangni chuan in theihtâwpin mi zawng zawng nên inrem tum rawh u.