INKHAWMNAAH KRISTA

JOHANA 4:23
Nimahsela, a hun a thleng dâwn, tûnah pawh a thleng tawh mêk, Pathian chibai bûktu tak takten thlarau leh thutakin Pa chibai an bûk tawh ang. Chutiang mi chu Pain amah chibai bûk tûrin a zawng a ni.

AJ Gordon (1836-1895) kha kum 15 mi lek a nih laiin a piangthar a. Baptist pastor a ni a, thuziaktu lâr tak a ni bawk. Boston-ah Clarendon Street Baptist Kohhran Pastor hna a thawk reng ṭhin a. A rawngbâwlna kawnga tichak ṭhintu leh ṭanpui nasa êm êm tu chu, amah ngeiin a ziah lehkhabu pakhat, “Inkhawmna-ah Krista a lo kalin (When Christ came to Church)” tihah khân a ziak a ni.

A lehkhabu-ah chuan rawngbâwlna a neih ṭan tak tak dâwna a mumanga a hmuh a ziak a. A mumangah chuan Clarendon kawtthlêr vêlah hian a lo vâk vêl a. Chutah chuan Biak inah kalin inkhâwm an ṭan dâwn a, thusawi tûrin Pulpit-ah a lâwn a ni.

Inkhâwm an ṭan tihah chuan Biak in kawngkhâr chu a rawn inhawng a. Usher chuan mipa zahawm tak rawn lût chu ṭhutna a lo kawhhmuh a, chutah chuan a ṭhu ta a. Gordon-a chuan inkhâwm chhûng zawng deuh thawin a en a. Tu nge anih a ngaihtuah char char a, a hre thei si lo a. Inkhâwm bân chuan hmuh a tum a, mahse a hmu hman ta si lo a. Mi zawng zawng an haw rêm hnu chuan Usher chu a zâwt ta a, Usher chuan, “Isua Krista a nih kha, i hre lo em ni? inkhâwm lai khân a awm ve reng a lawm. Ṭhutna a awm leh awm loh min rawn zâwt a, ka rawn hruai lût anih kha,” a ti a. Chu veleh Gordon-a chu a rawn harh ta zawk a.

Chu mumang a neih hnu aṭang chuan a rawngbâwlna a danglam ta êm êm a, a thihni thlengin chu a mumang chuan a nunah thu a sawi a ni. A mit ngeia an inkhâwmna-ah Lal Isua a ṭhu ve reng a hmuh hnu kha chuan a inkhâwm dân pawh a danglam a, a kal dân te, a ṭhut dân te, a ṭawngṭai dân te, a zai dân te thlengin thinlung leh tihtakzetin a ti ta a ni.

Mi hmuh atân maia inkhâwm ṭhin kan ni em le? Lal Isua kan kiangah rawn ṭhu ve se, engtin nge kan awm ang le?!