I THIH HNUAH KHAWIAH NGE

KOLOSSA 3:1-2
Chutichuan, Krista hnênah kaihthawha in awm ve tawh chuan chung lam, Pathian ding lama ṭhu Krista awmnaa thil awmte chu zawng rawh u. Chung lama thil awmahte chuan in rilru nghat tlat rawh u, leia thil awmahte chuan nghat lovin.

Vânramah i kal duh em? tih zawhna hi inzawh a ngai lo, kal kan duh vek ang. A kawng erawh kan zawh peih lo fo. He khawvêlah pawh hian kan zinna tûr emaw kan kalna tûr kawng kan zawh peih loh chuan engtikah mah kan thleng dâwn lo. A kawng kan hriat loh phei chuan kal thlen ngaihna a awm dâwn lo hrim hrim a ni. I ṭhianten zanriah tui tak an buatsaihsak che a, mahse ramhnuai pilril tak kal tlang a ngaih avângin peih lo ta la, chu zanriah tui tak chu i chân dâwn a ni.

Vawi khat chu ram pakhat-a an Lal hi hriat lâwk leh nat lâwk awm hauh lovin a muhlum dêr mai a. An ram Lal a thih thu chu a thang chak êm êm a. Puipunna hmun tinrêngah chuan an sawi sup sup a ni.

Lal hotu pakhat, an mifing chuan, “Khawiah nge a kal tâk ang le?” tiin a bula mite chu a zâwt a. Ṭhenkhat chuan, “Engati nge i hriat loh, Vânramah a kal ang chu,” tiin an chhâng a.

An bula ngawi renga lo ding pakhat chuan, “A kal lo ang, kan Lal hi kum tak tak a rawng ka lo bâwl tawh a, ram chhûng bial hrang hrangah kan zin dûn a, khaw hrang hrang kan fang ṭhin a. Kan kalna tûr hmun leh ni min hriattîr vek ṭhin a. Chung hmuna zin tûr chuan nasa takin kan inbuatsaih ṭhin. Mahse Vânrama kal chungchâng hi a sawi ri ngai lo a ni. Chu hmuna kal tûr chuan kan inpuahchah ngai lo bawk. Chuvangin Vânramah chuan a kal lo ang, a kawng pawh a hre hek lo ang,” a ti a.

Kan thih hnu-ah khawiah nge kan kal dâwn i inzâwt ang u! Khawvêl ram hrang hrangah kalin a kawngte chu hre êm êm mah ila, kan thih huna kan thlarau kalna tur atâna kan duh bêr vân kawng kan zawh loh a, chu hmun thleng tûra kan inbuatsaih loh a, a kawng pawh kan ngaihven loh chuan a pawi hlê ang.

MATHAIA 10:28 – Taksa tihluma thlarau tihlum thei lote chu hlau suh u; hremhmuna thlarau leh taksa tiboral theitu erawh chu hlau rawh u.