ENGLAND ROPUINA PATHIAN

THUPUAN 1:7
Ngai teh, chhûm zîngah a lo kal e, mit tinrêngin an hmu ang, amah chhuntute ngei pawhin an hmu ang. Khawvêla hnam tinrêngin amah an ṭah bawk ang: Ni e. Amen.

‘Lalpa rawngbâwl duh lo ram leh hnam chu, an la boral dawn si a’ tih hla lâr tak kan hria a, kan sa fo ṭhin a ni. Chutihrual chuan Lalpa rawngbâwl ram leh hnam inti chung reng si hian sualna a huangtau a, kan ram leh hnam hi a tluchhe mai dâwn emaw ni chu âw a tih theih hial a ni. Pathian ṭihmi tam tak ṭawngṭaina avângin khawngaihna hun kan la nei mêk a ni.

Khawvêl ram ṭhenkhat ropuina chu a khua leh tuiten Baibul an zir a, an ngaihhlut a, an zah vâng a ni. Chûng zîngah chuan England ram chanchin hlui chhuiin an hnam ropui lai ber chu a khua leh tuiten Pathian an ṭih a, a thu an zah hunlai kha a ni. Hun ropui pathum an tawnlai te chu:

1) Alfred the Great (849 AD – 899 AD) hunlai khan khawtlâng leh ram leh hnam siamṭhatna nasa tak a thleng a. Ram ropui an rawn ni chho hial a nih kha. Alfred-a hi English Lal rorêlna-ah chuan ‘The Great’ tih title pêk awmchhun a ni a. Bible a ngaina a, bu ṭhenkhat te phei chu a letling hial niin an sawi.

2) Queen Elizabeth-I hunlai khan khawvêlah England ram chu thiltithei ber an rawn ni a. An han chhui chian chuan Queen Elizabeth-I kha Bible chhut leh thehdarh phal hmasa bertu a lo ni reng a ni.

3) Queen Victoria lal ram awp zau tak kha a hunlai chuan thiltithei ber leh Lalram zâu ber a ni a. Vawi khat chu ram dang Lal fapain a ram ropuina thurûk a zâwt a, Queen Victoria chuan, “Baibul leh ka Lalpa Pathian chu kan ram ropuina thurûk a ni e,” tiin a chhâng.

TIRHKOHTE 10:35 – Hnam tin zîngah tu pawh amah ṭiha, thil dik taka ti apiang a lâwm zâwng mi an ni.