INTHAWINA NUNG

ROM 12:1
Chuvângin, unaute u, Pathian khawngaihna avâng hian, inthawina nung leh thianghlim, Pathian lawm tlâk ni tûrin, in taksa chu a hnêna hlân tûrin ka ngên a che u, chutiang chu in rawngbâwl dân tûr tak a ni e.

D.L. Moody kha a naupan lai chuan Bible bung leh châng a hre lo ve em em a. Chutin Bible lam hriatna hrim hrim hi a nei ṭha lo hle a ni. Ṭum khat pawh kum 17 mi anih laiin Boston Kohhran-a Sunday School an kalna-ah Bible bung leh châng a zawn thiam loh avangin a ṭhianten an nuihzat em em mai a ni.

Mahse kum 18 a nihin a piangthar hlauh mai a. Kum 1856 khan kum 19 mi niin rêlin Chicago ramah a kal a, pheikhawk zawrh hna a thawk a. Chu hna thawk reng chung chuan a phâk ang tâwkin Pathian rawng a bâwl ve reng a. Mahse hun puma Pathian rawng a bâwl loh avangin hlim tak tak thei lova inhriatna a nei a, pheikhawk zawrh hna chu a bansan ta a ni.

Kum 1860 khan a hun pumin Pathian rawngbâwl tûrin a inpe a. A pheikhawk zawrh lai kha chuan thla 8 chhûngin Dollar 5000 a hlawhchhuak hman a, mahse hun puma Pathian rawng a bâwl hnu chuan Dollar 300 chiah kum khatah a nei hman a. Mahse a pawi a ti lo, Lalpa rawngbâwl chu a thlang zâwk a ni.

Zirna lamah sâng tak thleng lo mah se a inpêkna chuan rawngbâwltu langsâr takah a vawrh chho a, chu mai nilovin a hming chawiin Pathian tâna chanchinṭha puandarhna ṭha em em mai Moody Broadcasting Network din a ni a, chu hnathawh chuan mi tam tak thlarau a chhanchhuak a ni.

D.L. Moody-a nun ang hi kan nei ve thei a ni. Hei hi inthawina nung leh thianghlim chu a ni.

THUFINGTE 23:26 – Ka fapa, ka thu hi awih la, Ka nun dân hi entawn ang che.