HMUHTHEIHLOA

– Dina Poonte
Tlabung Zodin

Hebrai 11:27
Rinnain lal thinurna chu hlau lovin Aigupta ram a kalsan a, hmuh theih lohva chu a hmuh avângin a tuar ṭan ṭan a ni.

Mosia chuan Hmuhtheihloa chu a hmu a, a hmalam hun mihring duhthusam; nuam kan tih zawng a lo thlena kan sawi fo ṭhin, “âm takin he hun hi i hmang ang u” tih kha ani tân chuan nitina a nun tur a ni mai a. Chutianga nun hmalam lo thleng tur aia duhawm zâwk chu eng ang tak ni ang maw? Hmuhtheihloa avâng chuan chung zawng zawng chu a kalsan a. Thlalêr ram ro vaivut sâ leh thli ro tak maia Pathian hmangaih fate a tlachawpa nunpui a, hmangaihna leh Hmutheihloa nihna leh mize mak si, chak si, ropui si te chu keini chhuan thlenga kan hriat turin chu vaivut sâ leh khu rum rum kârah chuan a lo palchhuak ta a ni.

Balaam sabengtung khân a pu Balaama hmuh theih lo chu a hmu a. A hlâwkna tur a ûm na kawngah chuan Hmuhtheihloa chu a chuanna sabengtung chuan a hmu a, hmalam pan tawh lovin kawng sîr lamah chuan pen a tum a, a pu chuan a pawt in an vaw ngial a, mahse Hmuhtheihloa hmu tân chuan sabengtung mai pawhin kal luih chi a ni lo tih a hria a ni. A ṭawng chhuak ta hial anih kha; leilung dân pêl rawkin sabengtung hial a ṭawng a ngai ta a ni. Chumi hnu chuan a pu Balaama mit pawh tih vâra awmin a kawng zawh lai chu a tâwp a, a lêt leh ta a ni. Hmuhtheihloa hmu te chuan mihring pawm dân ang, khawvêl nih dan tûr ang hi an kal dan phung a ni lova, Hmuhtheiloa hruaina leh phal chin, duh zâwng kha an nun kaihruaitu a ni tawh zâwk a ni.

Nang Hmuhtheihloa chu i hmu ve tawh em?