MI RETHEITE LAKA THILPHAL

DEUTERONOMY 15:11
In ramah rethei an awm reng dâwn a; chuvângin, thu ka pe a che u, in rama rethei te, tlachham te leh in unau te lakah thilphal hle rawh u.

He thu hi Israel faten Kanaan an luh huna an tih ngei ngei tûra hriattirna a ni. Kan Bible hmun dang kan chhiar pawhin mi retheite lamah hian Pathian hi a ṭang tlat emaw tih mai tûr a ni. Kan ramah pawh mi rethei kan tam hle a. Sorkar leh khawtlâng anga kan inenkawlna lamah te leh Kohhran lam thleng pawh hian mi retheite ngaihsak leh thilphalna kawngah kan harh a ngai hle.

Thomas Aquinas-a chuan, “Mi hausate hi mi retheite enkawl tûra Pathianin a tihhausak leh, mi retheite pawh mi hausate zarzo tûra Pathian ruat an ni a. Mi retheiin ei tûr neih loh avânga mi hausa chhang a rûk chuan a thiam lo zâwk chu mi hausa a ni.” a ti. Hei hi kan ramah pawh kan inenfiahna tûr pawimawh tak a ni ang. “Thil pe ṭhîntu lakah chuan mi tin mai hi ṭhian an ni.” (Thuf.19:6b).