THILPHAL HLÂWKNA

THUFINGTE 11:25
Thilphal hle la, i hausa ang, Mi ṭanpui la, an ṭanpui ve ang che.

Kan han chhiar aṭang hian thilphal hlâwkna chu kan hre nghal mai awm e. Kan Bible hi han chhiar han chhiar ila, mi thilphalte malsawmnaa vûr lêt an nih tûr thu tam tak kan hmu. Kan Lal Isua ngei pawhin, “Pe rawh u; tichuan, pêk in ni ang; ṭhahnemngai taka teh chhuaka, beng mukin, sâwi liam zawih zawih khawpin in ângchhûngah pêk in ni ang. Tehna in hman ngei khân tehsak in ni ang,” a ti a nih kha (Luka 6:38).

Mamawhtute hnêna kan pêk chhuah hi chawp leh chilhin a hlâwkna hmu nghal lo mah ila, Pathianin a bo thlau a phal ngai lo, khua reiah tal a rûl leh ṭhin; ‘I buh chu tuipuiah tawlh chhuak la, A hlâwkna i la têl ang.’ (Thuh. 11:1). Mi thilphal chuan a hun taka rulhsak leh tûrin Pathian Bank-ah a dahṭha ṭhin a lo ni! Kan chhungkua hian thilphal hlâwkzia engtiang kawngin nge kan hriat ve tawh le?