BARTIMAIA

MARKA 10:47-48
Nazaret Isua a ni tih a hriat chuan, “Isu, Davida Fapa, mi khawngaih rawh,” tiin a au ta vak a. Mi tam takin an hau va, ngawi tûra an tih pawhin, a hma aia ringin, “Davida Fapa, mi khawngaih rawh,” tiin a au zual sauh va.

Bartimaia hi Jeriko khuaa mi a ni a. A mit a del avânga kutdawh a niin a rinawm. Lal Isuan Jeriko a tlawh a, mi kâ aṭangin Isua chanchin leh Jeriko a tlawh thu a lo hre ve a ni ngei ang. Lal Isuan khua a chhuahsan dâwnah mipui tam takin an zui a, chu thâwm aṭang chuan a mit a tihvârsak theih ringin a lo au ve vak mai a ni.

Rabbi-hote hian kal chungtea thu an zirtîr ṭhin avangin Bartimaia lo au pawh hi ngâwi tûrin an khap a ni ang. Mi dang a vêngthawng lo, mitvâr neih a duh êm avângin mawi leh mawi lo pawh dâwn lovin Lal Isua chauh a beisei a, chuvangin a mit pawh tihvârin a lo awm ta a ni. Ngênngâwl taka Lal Isuaa beiseina leh rinna nghat tlatte chu an hlawhtling nge nge ṭhin. Hei hi vawiin thlengin a la dik zêl a ni.