MI CHUNGA ṬHAT CHHUAH

MARKA 12:31
A dawttu chu, ‘Nangmah i inhmangaih angin i vêngte pawh hmangaih ve rawh,’ tih hi a ni. Hêng aia thupêk pawimawh zâwk rêng hi a awm lo,” a ti a.

Vawikhat chu John Hopkins University-a Dr. Howard Kelley hi a ram chhuak chu kein a tum aia thui a kal a, a tui a hâl ta hle mai a. Mahse a awmna chu a hlat tawh êm avângin tui lamna mai tur a awm lo a.

Farm pakhata in a hmuh chu a va pan chawt a, hmeichhe naupang hian a lo chhawn a. A nu leh pate an awm loh thu a lo hrilh a. Doctor chuan tui in tur a dîl a, hmeichhe naupang chuan tui in tûr an neih loh thu hrilhin bâwnghnute in tûr a lo pe a. A duh tâwk a in tîr hnu chuan a kal leh ta a.

Kar hnih khat hnuah chu doctor chuan hmeichhe naupang pakhat hi inzaina dawhkânah a zai a, bawnghnute intîrtu hmeichhe naupang ngei mai kha a ni tih a hai lo.

Hmeichhe naupang chhûngte’n damdawi in awm man leh zaina man te an han hmu chu an sum neihin a tlin lo tih an hriatchian avângin an mangang hman kher mai; uluk takin an chhiar thla zar zar a, a tâwpa an thil hmuh chu mak an ti kher asin! ‘Bâwnghnute no hnihin heng bill zawng zawng hi a tlâk fel vek tawh e’ tih hi a lo inziak kalh mai nia.

Malsawmna tam tak hi kan pêk chhuah a zir zêl hian kan dawng lêt ṭhin ve tho a lo ni.

Midangte chungah hian phût lêt neih vâng nilovin ṭhat kan chhuah hmasa tur a ni a. Chu chu ringtu nun ṭha tak a ni bawk.