Nun Kawng Chaw

ISUA HMUH KAN DUH E

Auto Draft

– Chhantea (Oriela patea)
E. Lungdar

JOHANA 12:21
Chûngte chu Galili rama Bethsaida khaw mi Filipa hnênah an kal a, “Ka pu, Isua hmuh kan duh e,” tiin an ngên a.

Lal Isua rawngbâwlna a vânglai tak, mi tam takin an zuia an bawr luih luih laia Isua hmuh tuma lokal te hian Isua an hmu mai thei lo. Mahse hmuh ngei an duh si, mipui zi vêl tam tak kârah an tân hmuh mai a har aniang. Isua zirtîr Phillipa te bulah Isua hmuh an duh thu an va sawi anih kha.

An hnampui, an mahni ang bawk, an hmelhriat sa pawh ni bîk miah lo kha engtin nge Phillipa bulah kher Isua hmuh an duh thu kha an va sawi theih le. Phillipa kha a nun leh chêtzia leh hawiher engkimah a zui Isua duhdan leh zirtîrna in a nung in a awm ang a. Chu chuan ama chipui leh tualkhatpui te bulah khan a nihna zirtîr a nihna a ti lang a ni mahna. Amah kher an zawh chat dan ah hian.

Keini ve hi! Kan ṭhenawm khawveng, kan ṭhian te, unaute leh kan tualkhatpui te hian Isua hmuh kan duh e ti a an zawh tlâk kan ni ve em le? Engtiang tak chuan min hmu ve ang maw aw?

Heti lo zâwng pawh hian aw. Isua’n Jeriko a chhûn pelh dâwn laiin mitdel Bartimaia chuan Isua a lo au chiam a. Isua hnênah an hruai khan, ‘Isuan a lo bia a, “Eng nge tihsak che ila i duh?” a ti a. Mitdel chuan, “Raboni, hmuh theih ka duh,” a ti a’. (MARKA 10:51)

Helai thu hi a va pawimawh êm. Mithiam te chuan hetiang hian an sawi ṭhin. Mitdel Bartimaia hian a mitdelna ata khawvêl êng hmuh a, mi pangngai mit ang put ve a châk duhna ai mah in, amah tidam theitu Isua, zirtirtu (Rabboni) kha hmuh a châk in a duh a. Chumi zâwk chu a dîl a. A dîlna mai piah lamah khawvêl pawh hmu tûrin a mit a lo tih vâr sak ta a.

Keini ve hi chu Isua min tlan tawh hnu ah pawh… a duh tân pan a, a hnêna kal a, khawngaihna lalṭhutthleng kan ban phâk a hnuh hniam a nih reng lai a. Amah Isua hmu tûra kan inbuatsaih dân hi amah tak zirtîrtu tidam thei tu aiin khawvêl hi a ni tlat mai ang em. Mahni inenfiah ang u.

Lalpa’n a thu malsawm rawh se.

One Comment

  1. Ka nun a khawih hle Mai.

Leave a Reply

Your email address will not be published.

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.