NAUTE TUIHÂL

JOHANA 4:13-14
Isuan, “Tu pawh he tui in apiang an tuihâl leh ang; tu pawh an hnêna ka pêk tûr tui in erawh chu an tuihâl leh tawh lo vang. An hnêna ka pêk tûr chu, an kawchhûngah tuihnaah a lo chang ang a, chatuan thlengin a kang lo vang,” a ti a.

Nausen chu a tui a lo hâl a, a in theihna bottle-in kan intîr mai ṭhin. Rilṭamin tuihâl thei lo se, nu leh pa tân chuan kan ngaih a ṭha duh lo ngawt ang le. Chuvangin naute chu a ril a ṭam theih a, a tuiin a hâl thei anih chuan a hrisel hle tihna a ni.

Chuti ang chiah chuan nunna tui pawh hi a ni ve tho mai. Lal Isuan, “Tuihâl apiang lo kal sela, nunna tui duh apiangin a thlâwnin han in rawh se.” a ti (Thup. 22:17). Chu nunna tui inte chu engtin nge an awm zêl ang? Pathian lehkha thu sawi angin an tui nung luite a pumah a lo luang chhuak ang tih a ni. Hetah hian Isuan lo luang chhuak a tih chu Thlarau Thianghlim a sawina a ni.

A hmasa berin kan tui a hâl tûr a ni, tichuan Isua hnenah kalin tuiin tûr kan dîl dâwn a ni. Lal Isua chuan, “A dîl apiangin an dawng ṭhîn, a zawng apiangin an hmu bawk ṭhîn. Tu pawh a kik chu an hawnsak dâwn a ni.” a tih kha (Lk. 11:10).

Ringtute hian Thlarau Thianghlim kan châk deuh deuh tûr a ni a, “misual mahin an fate thil ṭha pêk nachâng an hriat chuan, in Pa vâna mi chuan a dîltute chu Thlarau Thianghlim a va pe dâwn em!” a ti (Lk. 11:13).

Lal Isuan tui min pêk, Thlarau Thianghlim kan neih chuan tumah kan tuihal leh tawh tih min tiam a, chuvangin unau duh tak, chu tui chu châkin Thlarau Thianghlimin min chênchilh turin bâng lovin i dîl ang u.

Lal Davida chuan Sam 42:2-ah khan, “Ka nun hi Pathian châkin, Pathian nung châkin a tuihâl a ni. Pathian hmaa kalin engtikah nge ka inlan ang?” a ti.

He khawvêla châkna dang zawng zawng chuan boralna min thlen thei a, nunna kawnga min hruaitu chu kan châk zâwk tûr a lo ni.