RINNA NGHET

RINNA NGHET 1

SAM 37:3
Lalpa ring la, thil ṭha ti rawh, He ramah hian awm la, A hausakna tlân rawh.

Nausen laiin hmêl mak deuh leh maksak takte hi nausente hian an nêl ngai lo va, an hlau hial ṭhin. Chung mite chuan thlêmna tûrin chocolate emaw vûr emaw sweet emaw pêk tum mah se an duh chuang ngai lo va, a nu emaw a pa hnênah bawk a tlanchhe ṭhin a ni.

Chutiang ang nausen rinna chu alawm Lal Isuan a duh. Setan-an thil îtawm tak taka min rawn thlêm pawhin kan rinnaah chuan nghet takin kan ding tûr a ni. Tu tâna nung nge kan nih tih hi kan inhrechiang em em a, chutih lai erawh chuan kan rinnaah kan dingnghet ṭhin lo hi a pawi thei hle.

Tirhkoh Paula chuan, “Chu vâng chuan a ni hêng thil pawh hi ka tuar ni; nimahsela, ka zak lo ve; KA RINA CHU KA HRIA” a ti (2 Tim. 1:12). Joba meuh pawh dinhmun chhe êm êma a din lai khan, “Ka tlantu chu a nung tih ka hre si a” (Joba 19:25) a ti a, “Mi tihlum hial mah sela, amah chu ka nghâk cheu vang” a ti hial bawk a nih kha (Joba 13:15).

Ṭhiante ringin intihlungawi emaw thlamuanna zawn kan tum ṭhin, Bible chuan, “Ṭhian ring suh ula..” (Mika 7:5) a ti a. Sam 125:1-ah chuan, “Lalpa ringtute chu Zion tlâng, tihnghîn rual loh, Kumkhuaa awm reng tûr ang chu an ni.” a ti daih.

Chuvangin Thufingte 3:5-ah chuan, “I thinlung zawng zawngin Lalpa ring la, Nangma hriatnaah innghat suh;” min ti. Lal Isua pawh khan, “Naute u, sum ringte tân Pathian rama luh a va harsa ṭhîn êm!” a ti a nih kha (Marka 10:24). Tunge kan rin dawn le?

Sam 118:8 – Mihring rin ai chuan Lalpa a rinna nghah hi a ṭha zâwk a ni.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy