HUL CHUNG CHUNG PAWHIN

— Pastor PL Thlenga, PhD.
Professor
Spicer Adventist University, Pune.

Mi ṭhenkhat harsatna lian tak nei si ṭawngṭai hlei thei lo, ṭawngṭai dâwna chham tûr pawh hre lo, hul tlat mai; hêng mite hian hul chung chunga ṭawngṭai chu awmzia a awm dâwn chuang em ni an ti ṭhin a.

Unau duh tak, kan ṭawngṭaina hi kan duah hluah avanga chhân kan ni lova, kan ṭawngṭai thui êm vâng leh kan ṭawngṭai thiam êm avang te, kan ṭawngṭai nun êm avang te a chhân tûr kan ni lo. Kan ṭawngṭai thiam êm vang leh duah hluah avanga chhân tûr ni dâwn ta ila, ṭawng thei lote, dang âwk deuh hote ṭawngṭaina chu chhân an ni mang dâwn lo tihna a ni dâwn a. Chuvangin ṭawngṭai duah thiam leh ṭawngkam thiamna hi chu lei mihringte ngaihṭhatna atân mai chauh a ni. Pathian lamah chuan thiam leh thiam lo kha kan inang reng a, kan duhna kha a pawimawh zâwka chu a ni. Kan mamawh êm vanga min khawngaihna avanga chhân kan ni zâwk. Chuvangin thiam lo chung chung pawhin ṭawngṭai la, hul chung chung pawhin ṭawngṭai ang che.

Rom 8:26-ah chuan ti hian Paulan alo sawi: “Thlarau chuan kan chak lohnaahte min pui ṭhîn a; engtia ṭawngṭai tûr nge tih kan hre si lo va; nimahsela, Thlarau chuan rûm sawi hleih theih lohvin min ṭawngṭaisak ṭhîn.” a ti a ni. Kan ṭawngṭaina hi a fel fai vek lo anih pawhin kan ṭawngṭai aia ṭha zâwk daihin Thlarau chuan min lo sawi fel sak ṭhin a ni. Dîl tûr pawh hre mang lo khawpa kan hul lai pawhin Thlarau chuan rûm sawi hleih theih lohin min lo ṭawngṭai sak ṭhin a ni. A dik tak chuan keini mihringte hi chuan kan hriatna a beitham êm avangin dîl tûr dik tak pawh kan hre lova, dîl loh tur te pawh kan dîl fo ṭhin a ni. Mahse Thlarau chuan dîl tûr kan hriat loh lai leh dîl nachâng kan hriat loh lai te pawh hian min lo sawi sak ṭhin a ni.

Zanah kan mut dâwnin ‘Lalpa naktûk zîngah ṭha taka ka zun theih nân leh ka êk theih nân min ṭanpui ang che’ tih chu kan chham khât viau mai thei. Mahse Thlarau chuan nachâng kan hriat loh leh kan chham hmaih zawng zawng te thleng khan min lo sawi sak ṭhin avangin zîngah dam takin kan thova, kan zung a, kan e thei mai zâwk a lo ni (Zung theilo leh e thei lote hi a sawisak lo bik tihna ni lovin). Chuvangin min ṭawngṭaisaktu Thlarau Thianghlim leh Pa hnêna min sawi saktu Isua hi ring ngamin thiam lo chung chung pawhin, hul chung chung pawhin i ṭawngṭai zêl ang u. Kan buaina leh harsatna hi Isua hnênah i thlen zêl ang u. Christian sakhuana hi emotion-ah ringawt a innghat lova, hlim châng chu tam mahse, hlimna ringawtah a innghat lova, a thu ang zela kan awmna ah hian malsawmna chu a awm zâwk a ni.

Abrahama pawh khan a fapa a hlan dâwn khan a phûr lo teh asin. A thlarau a thawk lo teh asin. ‘A, tûn ṭuma Pathian min tih tîr tum hi chu ka phûr lo êm mai. Keimahah thawktu a awm lo, ka hul êm mai’ tiin a fapa kha hlân lo ta sela, rinna a kan pa tih ani hauh . Mahse a phûr êm vang leh a thlarau a thawh êm vanga malsawmna dawng a ni lo. Phûr lo tak chung pawha Pathian thu a ni miau sia ti a, Pathian thu ang zêla a awmnaah zâwk khan malsawm a ni. Chuvangin phûr lo deuh chung pawhin Pathian thu angin i kal zêl ang u. Peih lo deuh chung pawhin i inkhâwm zêl ang u. Hul chung chung pawhin Pathianin min duh angin i dîl zêl ang u. I ṭawngṭai zêl ang u. Min dîlpuitu leh min ṭawngṭaisaktu Thlarau Thianghlim kan nei si a. Lalpan malsawm vek che u rawh se.