PUITLINNA KAWNG

1 TIMOTHEA 4:8
Taksaa insawizawi hi a sâwt ngawt mai, thlarau lama insawizawina erawh chu kawng engkimah a ṭangkai a, tûn dam chhûng leh nakin hun atân a sâwt êm êm a ni.

Wilma Rudolph-i chu Olympic-a hmeichhe zînga Gold medal pathum la thei hmasa ber a ni a. Nausen a nihin Pneumonia a vei a, Polio natna hrîin a ke pakhat nerve a tichhia a, kum 11 a nih thleng khan metal brace hmangin a inhâwl kal thei ṭawk ṭawk a ni.

Tumruhna neiin tûk khat chu kal a zir a, tichuan zîng tin a zir a, a lo thiam zêl a, kum 16 a lo tlin meuh chuan a tlân thei ta a, Melbourne Olympic-ah a tel ve ta a ni. Chutah chuan relay race-ah Bronze medal a la dêr mai a. Kum 4 hnuah Rome Olympic-ah tel lehin Gold Medal 3 a hâwn thei ta hial bawk a ni.

Ringtute hian intihsiakna kan nei a, chu chu nunna lallukhum chang tûrin a ni. Chu lawmman chu dawng tûrin ni tin Pathian thuah training kan nei tûr a ni.

Kan taksa ṭhang zêl tûrin chaw leh tui a mamawh ang hian Pathian thu hriatna kawnga ṭhanglian tûrin bible chhiar tam te, ṭawngṭai leh inkhâwm te hi kan tih tûr a ni a. Chu chu rinna kawnga kan chaw ṭha ber a ni bawk.

Chu rinna kawnga kan puitlin theihna tûra chaw ṭha ber nei tûr chuan tumruhna te, taihmâkna te, tawrhchhelna te, tih tak takna te kan mamawh hle.

Intihsiaknaa lawmman dawng tûra insawizawina kan nei ṭhin ang leh, training hahthlâk tak tak kan lâk ang hian rinna kawnga puitling zêl tûr chuan Pathianina min kohna zâwnah, thawk tûra min tihnaah te rinawm taka kan tih a, a thu kan awih zêl hi a pawimawh êm êm a ni.

Hebrai 12:2 – Kan hmaa intlânsiakna tûr awmah hian chhel takin i tlân zêl ang u.