MIDANGTE HMANGAIH

ROM 13:8
Inhmangaih tawnna ngawt lo chu tu ma eng mah ba suh u; mahni mihringpui hmangaihtu chuan Dân a zawh famkim tawh a ni.

Hun tam tak kaltaah khan he thawnthu hi an sawi ṭhîn.

Vawikhat chu hmeichhe naupang hi na takin a nuin a hau a. Christmas Tree cheina tûr atâna rangkachak rawng lehkha mawi tak mai chu a lo tithlêrin a lo tichhe vek mai a. A man a to si, a nu chuan thinrim awrphiarsen hmuhin a hau a. A ṭap zawih zawih mai a ni.

A tûkah chuan hmeichhe naupang chuan a nu hnênah present a pe a. A nu chu a lâwm êm êm a, a fanu present box-a han hawn chuan engmah rêng a lo awm lo a. A thinrim leh ta a, miin present an pêkin a chhûngah engemaw tal an dah ṭhin thu a hrilh a. Hmeichhe naupang chuan, “Ka nu, a chhûngah khan ka thinlungin a hmangaihna che leh ngainatna zawng zawng che, bâwm a khah hmâ ka thun lût asin” tiin a chhâng a. Chu veleh a nu thinlung chu a kehchhe ta a. A fanu chu ngaihdam a dîl ta a ni.

Hetiang hian he khawvêlah hian kan thilte aiin kan chênpui leh kan mihringpuite hi kan ngai pawimawh lo fo a. Kan mihringpuite hi khawvêl thil leh bungruate ai hian an hlu zâwk a ni tih hi kan hre lo fo a ni.

Chhûngkuaah phei chuan a ni bîk êm êm a. Kan unau, kan nu leh pa, kan fate aiin inchhûng bungrua leh eng ilote hi kan dah hlu zâwk emawni chu aw tih theih tûrin chûngte avang chuan inhauhna leh inlungrual lohna kan chawk chhuak fo ṭhîn a ni.

Thildang zawng zawng aiin kan mihringpuite nêna kan inpumkhatna hi a pawimawh.