KHAWIAH NGE I AWM?

– Chhantea (Oriela patea)
E. Lungdar

Genesis 3:9
Tin, Lalpa Pathian chuan Adama chu a ko va, a hnênah, “Khawiah nge i awm?” a ti a.

Mihring tungchho a kal, a chhia leh a ṭha thliar hrang thei chuan khawiah nge kan awm, eng hmunah nge kan awm, eng dinhmunah nge kan din chu mahni kan inhre ṭheuh awm e.

Pathian duh dan leh a remruatna angin kan nung nge keimahni duh danin kan nung le i inngaihtuah ang u.

Bawhchhiatna in mihring a fan a, anmahni duhthu ngeia Pathian dân ṭha an bawhchhiat a, thiamloh channa-ah an inbarh luh khan Pathian khan a thilsiam mihring (Adama te kha) a hmu lo em ni le. ‘Khawiah nge i awm?’ ti a a koh tlat ni le.

Ni lo e. Thilsiamtu chuan a thilsiamte chu eng dinhmun ah nge an awm a, enge an tih, enge an sûkthlêk chu an hre ṭheuh ang. Mahse an nunah duhthlanna a dah miau avangin amah lo lam an thlan mêk lai pawhin amah lam thlang tûrin tihluihnain a enkawl lo thung. Tichuan mihring chuan a duhthlanna hmang suala Pathian dân ṭha a tlûkchhiat san tâkah chuan Pathianin a hmu lo ni lovin a dân ṭha an tlûk chhiat san avangin ‘khawiah nge i awm?’ tiin a zâwtin a chhâl ta a ni.

Pathian hmangaihna tâwp nei lo chuan a thilsiam a duh leh a hmangaih êm êm, thilsiam dangte aia chungnunga a siam. A thilsiam te vêng leh enkawl tûra a tih ten an tlûksan hnuah pawh an dinhmun inhria se, amah an tlûksanna hmun ata inchhîra amah an pan lêt theih nân bawhchhetu mihring te khan an dinhmun an hriatna atân ‘khawiah nge i awm?’ tiin a au zui lawm lawm anih kha.

Mahse mihring te khan bawhchhiatna a tlu leh chhandam ngai, ngaihdam ngai nihna lamin thlûk lo in, mahni thiam inchantîrin a siamtu chu mawhchhiat in, Adama chuan, “Mi awmpui tûra i hmeichhe mi pêk ngei khân thing rah chu mi pe a, ka ei ta a ni,” a ti a (Genesis 3:12). Mahni an la inhum ṭang ṭang anih kha. Mahni awmna hmun fel lo leh dik lo pawh thlu lovin sual lam an la âwn zui tlat reng anih kha. DL Moody chuan eden huana Pathian aw hi Pathian thinlungnâ ṭap thâwm a ni a ti a. A thilsiam a hmangaih êm êm ten amah kalsan a bawhchhiatnaa an tlûksan pawiti leh thinlungnâ ṭap thâwm a ni a ti.

Aw le… nang leh kei hi tuna kan dinhmun mêk aṭangin Pathianin ‘khawiah nge i awm?’ tiin min ko mêk a. Zu bawih, drugs bawih, sualna chi hrang hrang bawiha tâng pawh kan ni mai thei. Chuta ṭang chuan mahni inthup a in hum lovin kan nihna ang angin ‘Lalpa heta hi ka awm’ tiin i lo chhâwn ang u khai.

Eng mi pawh niin eng dinhmunah pawh awm ila, kan awmna hmun aṭang khan Lalpan min siam ṭhat a duh reng a ni.

Jeremia 33:3
‘Mi au la, ka chhâng ang che, thil ropui leh inthup i hriat ngai loh chu ka entîr ang che.’

Kan awmna hmun ṭheuh aṭangin Lalpa i au ang u.