PATHIAN GEOGRAPHY

JEREMIA 29:14
‘In hmuh tûrin ka awm ang,’ tih hi Lalpa thuchhuak a ni. Sal ata ka chhuah ang che u a, ka hnawhdarhna ram hnam zawng zawng leh hmun tinrêng aṭangin ka hruai khâwm leh ang che u,’ tih hi Lalpa thuchhuak a ni.

National Geographic News chuan kum 2006 khân America ṭhalaite zîngah survey a nei a. A survey aṭang chuan America ṭhalaite chuan ram awm dân an hre lo hle tih an hmuchhuak a ni.

Survey aṭang chuan America rama kum 18-24 inkâr ṭhalai 100-a 63 te chuan Middle East awmna an hre lo a. 100-a 50 chuan New York State awmna an hre bawk lo va, hmun thuma ṭhena hmun 1 chuan Louisiana awmna an hre lo va, 100-a 48 chuan Mississippi awmna an hre lo bawk a ni.

Geography hriat hi thil pawimawh deuh mai a nih rualin a aia pawimawh chu Pathian geography hriat hi a ni.

Hebrai 11:6-ah chuan tihian kan hmu, “Rinna lo chuan Pathian tihlâwm rual a ni lo. Tu pawh Pathian hnêna lo kal chuan Pathian chu a awm ngei a, amah zawngtute tihlawhtlingtu a ni tih an ring tûr a ni.” tiin.

Pathian chu zawng tûr leh amah tilâwm tûrin min hrilh. Chumi ti thei tur chuan kan Pathian hi a awm/nung a ni tih kan hriat a pawimawh hle a. Kan Pathian hi a nung a ni tih kan hriat a, a awmna kan zawn a, kan hmuh a, a hnên kan pan a ngai a ni.

Pathian kan zawn theihna tûrin a thu-ah a awmna min hrilh. Jeremia 29:13-ah chuan, “Min zawng ang a, tihtakzeta min zawn hunah min hmu ang.” a ti a ni.

Pathian hmu tûr chuan kan zawn ve a ngai a ni.