NUNNA TUI

JOHANA 4:10
Isuan a chhâng a, “Pathian thilpêk leh i hnêna, ‘In tûr mi pe rawh,’ titu hi hria ni la chuan, a hnênah i dîl zâwk ang a, ani chuan tui nung a pe tûr che a ni,” a ti a.

United States of America chuan Dollar maktaduai tam tak sêngin Mars-ah tui a awm leh awm loh an zawng a. Kum tam tak liamta-ah khan NASA chuan robot pahnih tîrin chu hêltu arsi sen-ah chuan tui a awm leh awm loh an zawn tîr a ni.

United States chuan engvangin nge he thil hi an tih. Chu robot pahnih vâk vêl leh Scientist-te chu data hmangin an inbe pawp reng a. Mars-ah chuan nun a hman theih dâwn em tih chu an zâwng a ni. Nun a awm theih leh theih loh hre tûr chuan tui a awm leh awm loh hriat phawt a ngai a. Tui tel lo chuan mihring kan nung thei si lo a ni.

Kum 2000 chuang liamta-ah khan Samari ram khaw pakhat, Sukar an tih-ah chuan tui zawng mi pahnih an intawng a, pakhat chu Galili-mi a ni a, pakhat chu Samari hmeichhe pakhat a ni.

Chu tuichhunchhuah bulah chuan Lal Isuan a mamawh tui a hmu a, Samari hmeichhia pawh chuan a mamawh nunna tui a chhar bawk.

United States ina Mars-a an zawn tui kha tisa nunna tui mai a ni a. Lal Isuan nunna tui min pêk erawh thlarau nunna tûr a ni. Tui hi nunna tûr atâna a pawimawh êm êm rualin Lal Isua erawh chuan tui tak tak zawng tûrin min ti a. US Scientist-ten Mars-ah tui hmu mah se nunna tui kan neih chuan si loh chuan eng nge kan tân sâwt ang.

THUPUAN 21:6
Tuihâl apiang hnênah nunna tuikhura mi a thlâwna in tûr ka pe ang.