NUPA HLIM LOVIN A NGHAWNG

SAM 127:1
Lalpan in a sak loh chuan, A satute an hah thlâwn mai a ni. Lalpan khawpui a vên loh chuan, A vêngtute an meng thlâwn mai a ni.

Zu leh drugs ti nasa te leh zûk leh hmuam ti nasa lutuk te hi an kawppuite tân an thlâkhlelhawm lo va, nupa nun hlim taka hman a har ṭhin. Zu leh drugs ti ṭhin tam takte phei chu an kawppuite leh an fanaute bulah an awm tlêm a, chhûngkaw inawpna a kalpui ṭhat theih loh bâkah Pathian biakhona boruak a awm thei lo bawk. Sum hi kan mamawh em em rualin nupa hlim lohna thlen khawpa hmalâk hi engmahin a man lo tih hriat a ṭha.

Nupa hlim lo boruak chuan chhûngkaw boruak a tichhia a, naupangin inchhûng nuam an ti lo va, khawlaiah leh mi inah an leng tam a, chu chuan anmahniah nun ṭha lo a hring chhuak leh ṭhin. Nupa hlim lohna hian inṭhen a chawh fo va, chu chuan chhûngkaw kehchhia a lo hring chhuak ṭhin a. A rah chu khawtlâng leh ram tân pawha hnawksak mi sual puntîr a ni mai. Eng ang chhûngkua nge in nih le?