A PAWI LO, A PAWI LO
SAM 46:1
“Pathian chu kan inhumhimna leh kan chakna, Mangan laia tanpui vartu hnai reng a ni.”
He hla phuahtu hi Chicago lawyer lâr tak, Horatio G. Spafford a ni a. A hla thuah hian, ‘When peace, like a river, attendeth my way, When sorrows like sea billows roll;’ tih kan hmuh avângin hlim lâi leh lawm lâi taka phuah ni thei hian a lang lo.
October 20, 1828, North Troy, New York-ah a lo piang a. Mihring tawn atân chuan lungngaihna vawrhtâwp ni tûra ngaih Spafford-a hian a tawngbua a. Kum 1870 khân a fapa neihchhun kum 4 mi chuan a boralsan a, a kum leh 1871 khan Chicago Fire an tih kângmei râpthlâk tak chhuakah Lake Michigan-a a in leh lo ram zau tak mai a kâng ral leh vek a.
Chicago Fire a zawh hnu kum 2-ah, an chhûngkua chu Europe ramah zin khawthawn tum leh thuhriltu lâr tak D.L. Moody leh Sankey rawngbâwlna puibâwm tûrin kal an rêl a. An kal dâwn dârkârah Spafford-a chu a sumdawnna thil avangin an rawn be thut a, a kal ve thei ta lo a.
A tel lovin a nupui leh a fate chu ‘SS Ville du Havre’ an tih lawngah November ni 22, 1873 chuan a kal tîr ta a. Mahse a nupui leh fate chuanna lawng leh English lawng ‘The Lochearn’ an tih chu a insu ta mai a, Spafford-a nupui leh fate chuanna lawng chu minite rei lote chhûngin tuipuiah a pil ta a. Mi 226 laiin nunna an chân a. A nupui erawh chhanchhuah hman a ni a, mahse a fa 4 ngawtin nunna an chân leh a ni.
A nupui-te chanchin chu ni 9 hnuah Telegram hmangin a hria. An fanu tê ber, Bertha Spafford nen lawngin a nu leh unaute chêtsualnaah chuan va kalin a hmun an thlen meuh chuan Spafford-a lungchhe vânkai chuan lawng cabin-ah tlân lûtin he hla hi a lo phuah ta a ni.
A pawi lo, A pawi lo,
Chatuan nunna chang thei ilangin.
