HRIATCHIANNA HLU BER

HRIATCHIANNA HLU BER 1

1 JOHANA 3:2
Amah a lo inlâr chuan amah angin kan awm dâwn tih zawng kan hria, amah chu a awm pângngai ang takin kan hmu dâwn si a.

Van nun ropui tem lâwkna nei hiala sawi leh amah ngei pawhina Isua zâra changa inhria Fanny Crosby hian Pathian fak leh chawimawina hla ropui leh ṭha tak tak sangriat chuang a phuah niin an sawi a. Rimawi siamchhuaktute nêna inremna leh thawh hona an neih hnua a puitlin chhoh meuh kha chuan kâr khat chhûngin hla puitling pathum bâwr vêl a phuah ṭhin niin an sawi.

A mit a del avangin a hriatna leh Pathian pâwlna a neih tlem phah lo va, a hla phuahna kawngah Pathian pâwlna nasa tak a chan phah zâwk a, chu chuan hêng a hla siamchhuahte hi a tinung zâwk em em bawk a ni. Mak deuh mai chu a rilru-ah hian hla a awmsa veka, chu chu a sawichhuak a, a ṭhiante emaw a thawhpuiten a thlûk nên an lo siam mai ṭhin a ni.

‘Blessed Assurance’ tih hla KHB No. 415 ‘Hriatchianna hlu ber’ thlûk hi kum 1873 khan Metropolitan Life Insurance Company hmuchhuaktu nupui, Phoebe Palmer Knapp-i siam a ni a. Chumi kum chuan Phoebe hian Brooklyn-ah Fanny Crosby chu a va pan nal nal a, hla thlûk a siam thu a hrilh a. Fanny chuan, “Anih han play la” a ti a. Phoebe chuan uluk takin a han play rât rât a, “A thlûk chu eng nge ang i tih?” tia a han hawi lêt chuan Fanny Crosby chu ṭhingṭhiin a lo ṭawngṭai reng tawh mai a.

Engmah sawi lo chuan Phoebe chuan a han play chhunzawm ve zêl a, vawi hnihna leh vawi thumna a han play zawh chuan Fanny Crosby chuan, “Chu chuan tihian a sawi, ‘Hriat chianna hlu ber, Isua ka ta, Van nun ropui tem lâwkna hlu tak chu’” tiin.

Tichuan, he lâwmna leh thlamuanna hla duhawm tak, chung vân miten min rawn thlen ve chu chang vein min hruaikhâwm hun tur thlîr lâwkna min neih theih tîrtu chu kan lo nei ta a ni.

Hriat chianna hlu ber, Isua ka ta,
Vân nun ropui tem lâwkna hlu tak chu;
Pathianin min lei, chhandam kan ni,
Thlarauva piang, thisen sil fai chu.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy