PATHIAN LEHKHA THU

ROM 9:17
Lehkha Thu-in Farawa hnênah, “He mi avâng ngawt hian ka tungding che a ni, nangmaha ka thiltihtheihna ka entîr theihna tûr leh, khawvêl zawng zawnga ka hming a than theih nân,” a ti si a.

Rawngbâwltu lâr tak hi vawi khat chu a zinkawngah a vânduai palh a, a car a chhiat avângin kalkawngah a tâng a. A tânna bula khaw te takte-ah chuan intihharh pah leh puitu beiseiin a kal a. Chutah chuan a ṭhianpa hlui a tawng a.

A ṭhianpa hlui tawn chu a lo rui khawp mai a, zu leh nulate nên hun an lo hmang a. Rawngbâwltu chuan, “Engtizia nge heta i awm mai le? Frank, tun hmate kha chuan mi hausa leh awmthei tak kha i ni ṭhin a, i va tlachhe ta êm êm ve?” a ti a.

Frank-a chuan a tlâkchhiat dân te, a sum tam tak miin an pûksak an pêk leh theih loh avânga rethei taka a awm thu leh nun kawngdik pawh a zawh theih loh thuin a chhâng a.

Rawngbâwltu chuan, “Hâw vang vang la, i Bible keu la, i kutzungṭanga kâwkin uluk takin chhiar la, chutah chuan Pathian chhânna i dawng ang” a ti a, a kalsan ta a.

Hun tam tak a ral hnu chuan rawngbâwltu chuan chawlhniah a ṭhianpa Frank-a chu a hmu leh ta hlawl mai a. A hmuh dân erawh a danglam ta! Frank-a chu Mercedes Benz car dum nalh leh fai tak aṭangin a rawn pên chhuak a, Rolex sana a bun chu a tle vât mai bawk a, Gucci coat suit pâwl nalh tak a rawn ha bawk a.

Rawngbâwltu chuan, “Frank, ka hmu leh thei che chu ka lâwm hle mai, i nunah thil danglam tak ka hmu a, Pathian chu fakin awm rawh se” a ti a.

Frank-a chuan, “Ṭhianpa, ka lâwmna zawng zawng hi i chungah leh Pathian chungah ka hlân e. Ka Bible ka keu a, uluk takin ka chhiar a, ka nun tihdanglamin a awm a. Malsawmna chu ka hriatthiam phâk bakin ka chungah a thleng ta a ni.” a ti a.

LUKA 24:45
Tichuan Pathian Lehkha Thu hriat nan an thinlung a tifing ta a.