NUN CHHUNTLANG

HEBRAI 4:12
Pathian thu chu a nung a, thil a ti thei a, khandaih hriam tawn eng anga hriam ai pawhin a hriam zâwk a, ruhtuah leh thlîng te, nunna leh thlarau inzawmnate a phel hrang thei a, rilrua ngaihtuah leh tumte pawh a hre nghâl thei a ni.

Evangelist ropui tak, John Wesley (1703-1791) kha vawi khat chu a inkhâwm bâng haw hi rûkruten an lo tibuai a, an man bet a. A neih zawng zawng lâksak tumin an bei a.

Wesley chuan pawisa tam tak a nei lem lo a, a pawisa neih chhun chhun leh kristian lehkhabu tlêm azawng a ah chu an lâksak ta ringawt mai a ni.

Neih a neih loh avang chuan kalsan mai an tum a, mahse Wesley-a chuan an kal liam hmain a ko a, engemaw pêk tur a neih thu a hrilh a. Rûkrute chuan mak an ti êm êm a, beisei nei deuh chung chuan an va pan leh a.

Wesley-a chuan, “Ṭhiante u, tuna in awm dân hi pawi inla ti viau ang. In thil tihsualah inchhîr hun in rawn nei anih chuan hei hi hre reng ang che u. Kan sualna zawng zawngte Isua krista thisenin a tlengfai tawh, tih hi” a ti a. Chu thu mai a hrilh avang chuan misualte chu an tlanbo ta vek a.

Kum a liam hnu chuan chawlhni inkhâwm bânah Wesley-a chu a ṭhiante nen an inchibai liam liam a, chutih lai chuan mi danglam tak hian a rawn chibai ve bawk a. A insawi hnu chuan hmâna a inkhâwm bâng lo rawk tute zînga mi kha a lo ni reng mai a. Pathian thiltihtheihna a chungah a lang a, a lo piangthar a, sumdâwng hlawhtling tak a lo ni ta a ni.

Kan awm ang anga min hmangaihtu a awm. A hnên chu pan ila, a khawngaihna kutin min lo chelh dâwn si a.