THLARAU RAH

GALATIA 5:22-23
Thlarau rah zawng hmangaihna te, lâwmna te, remna te, dawhtheihna te, ngilneihna te, ṭhatna te, rinawmna te, nunnêmna te, insûm theihna te a ni. Chutiang kalh zâwng Dân a awm lo ve.

Thlarau rah pakua Paulan a sawite hi bawr thumah a ṭhen theih a. A bawr khatna – hmangaihna, hlimna leh remna te hian Pathian nêna kan inlaichînna lam a kâwk a; a bawr hnihna – dawhtheihna, ngilneihna leh ṭhatna te hian kan mihringpuite nêna kan inlaichînna lam a kâwk a; a bawr thumna – rinawmna, thuhnuairawlhna leh insûmtheihna te hian mi mal nun a luhchilh thung an ti ṭhin.

Mizote hian thlarau thilpêk lam hi kan ngaisângin he lamah hian kan rualawt tlângpui a. Thlarau rah lamah erawh chuan ṭhan tumna leh rualawhna kan nei lo hle ṭhin niin a lang. Biak in lama ringtu duhawm tak ni anga lang, in lama mi dangin ramhuai thlarau ang maia min lo hmuh leh si te pawh hi kan awm ang tih a hlauhawm hle. Thlarau rah chhuahna hmun chu a nuamin a zalen ṭhin.