ISUA CHUNGA TI ANG

THUFINGTE 28:27
Rethei ṭanpui la, tlâkchham i nei ngai lo vang, Pachhia maimitchhînsantu chu ânchhia an lawh huai huai ang.

Tlangval pakhat hi India rama zin a tum a, engemaw ti tala hlawhtlinna a beisei a. A unau te, a chhûngte leh a ṭhiante chuan an ngaih pawimawhsak lo a, kal lo turin an hrilh a, a hlawhtlin an ring lo a ni. Mahse a kal lui ta tho a.

Kum tam tak India rama taima tak leh thawkrim taka hna a thawh hnu chuan a lo hlawhtling ta hle a, lawng lian tak tak a nei a, sum leh pai lah a ngah a, a hausa ta hle a. An ram Lisbon-ah chuan kîr leh tûrin a inbuatsaih a. Mahse a haw hma chuan engtin nge a ṭhiante leh a unauten an lo dawnsawn ang tih chu a ngaihtuah nasa êm êm a. Chutia a rilruin thil tam tak a ngaihtuah hnu chuan hetiang hian a haw ta a ni.

A lawng nen chuan a haw a, an ram a thlen hnu chuan a thawmhnaw ṭha tak tak chu a phelh a, kawr pawp hniang hnuang leh ṭawp tak chu a ha a, ip chhe tak pakhat a ak bawk a. A unau hnênah chuan va kalin, “Hei dam takin ka rawn haw a, khawngaihin i inah ka rawn thleng thei ang em?” a ti a. A unau chuan room ruak a neih loh thu leh a thlen theih loh tûr thuin a chhâng a. Beidawng tak chuan a kalsan a, hmâna a ṭhian ṭha ber hnênah chuan a va dîl leh a. A ṭhianpa pawh chuan a thawmhnaw leh hmêl chu a enin a ten a, thlen a phal lo a.

Tichuan, chu tlangval chu a lawngah a lêt a, chutah chuan a awm rih a, thla khat vêl a awm hnu chuan an khaw Lisbon kawtthlêr ualau taka in lian leh ṭha êm êm mai chu a lei ta rup mai a. A unau leh ṭhianten an han hriat chuan an indawm kun ngawih ngawih a, an ina thlen an phal lo kha an inchhîr a, mahse khua a tlai zo tawh, an unaupa chu an pawh ngam lo a, an be ngam lo a, râl aṭangin an thlîr an thlîr ta ringawt mai a ni.

THUFINGTE 14:31
Retheite nêkchêp hi siamtu hmuhsitna a ni; Pachhiate lainattu chuan a chawimawi a ni.