THLARAU RAH – HLIMNA

THUFINGTE 15:13
Thinlung hlim chu hmêlah a lang a, Thinlung ngui chuan rilru a tichau.

Bishop Stephen Neill-a chuan, “Ringtu hmasate kha mi hlim thei an nih avangin khawvêl pumpui an hneh thei,” a ti a, a dik nachen a awm mai thei e.

Tûnlaiah damchhûng khawsak ngaihtuahna te, sualna leh natna chi hrang hrang lo pung chho zelte hian mi tam tak rilru a luah a, hmêl hlim hmuh tûr nei mang lo pawh kan tamin a lang ta. Hengte hian Kristian chhungkaw tam tak pawh min tingui niin a lang.

Hetiang a nih lai mêk hian Thlarau Thianghlim chênchilh ringtu chu harsatna kârah pawh a hlim ṭhin a, tlâkchhamna kârah pawh a lungawi bawk ṭhin. Charles Allen-a chuan, “Khawvêla tui zawng zawng hian Thlarau Thianghlim mei chu a timit zo lo va, khawvêl buaina leh manganna zawng zawng hian ringtu thinlunga Thlarauvin hlimna a pêk chu a chhilh zo lo,” a ti a. Hetianga ti ve thei tûrin i inbuatsaih ang u.