PATHIAN MI THLAN

HOSEA 11:1-3
Israel hnam chu a naupan lai ata tawh ka hmangaih a, Aigupta ram ata ka fapa atân ka ko chhuak a ni. Koh an nihin an hla sauh va, Baal-ho hnênah an inthawi zâwk ṭhîn a, Milem siam chawpte hnênah rimtui an hâl a ni. Kei erawh chuan Ephraim chu bâna dawmin kal ka zirtîr a, Anmahni ka tihtîr a ni tih erawh chu an hre lo.

Pathian hian a thlan Israel te chu pêng bovin amah lo Pathian dang te biaksan fo mah se a hmangaih a. A ko tlat bawk a. Chuti chung chuan koh an nihin an hla sauh va. Amah biak aiin Pathian dang an biaksan zâwk a.

Keini pawh sual ata a hnên pan tûra koh kan nihin kan hla sauh va. Kan sual zual sauh emaw tih tur a ni a. A hnêna thilpêk leh thil hlan aiin kan châk zâwng thil tihna atân maichâm te kan la siam zâwk zêl anih hi.

Heti chung hian min hmangaih a. Min hmangaih tlat a. Min thlang tlat a. Min la thlang zêl bawk hi lâwm tûr kan va ni êm.

Ephraima ang (chhang leh loh, hmin kim lo) kan ni chungin kan tlûk loh nân kan bân a dawm a, kal min zirtîr a. A hnên pan tûra min sâwm lai hian a kohna leh min thlanna hi i hnuchhawn lui fo lo ang u.