INKHAWM TAM

INKHAWM TAM 2

JOHANA 4:23
Chutichuan, a hun a thleng dâwn ta, tûnah pawh a thleng tawh mêk, chumi hunah chuan Pathian chibai bûktu tak takten thlarau leh tihtakzetin Pa chibai an bûk ang, Pain chutiang mi chu a chibai bûktu tûrin a zawng a ni.

Sakhaw hrang hrang vuantute hian Pathian kan nei ṭheuh mai a. Kan Pathian kan biak dân pawh a inang lo tlâng hlawm hle a ni. Sakhaw khat vuan ṭheuh ṭheuh pawh kan Pathian kan biak dânah kan inchen lo hlawm em em a, ṭhenkhatin ni tina an biak laiin ṭhenkhat erawh chuan an Pathian an biak kawngah an chak lo hlê ṭhin a ni.

Vawi khat chu India mi Hindu tlangval hi California-ah chawlhni-a Kristiante inkhâwmnaah a tel ve a. Nuam a ti em em a, Biak in leh a chhehvêlte chuan a mit a titlai a, an Biak in sak dân te chu ropui a tiin mâwi a ti êm êm a. A ṭhianpa hnenah chuan, “Ṭhianpa, Biak in in nei ṭhain a nuam ka ti hle mai. India rama Temple lian tak tak ai pawhin a ṭhain a mawi a ni.” a ti a.

Mahse chu Hindu tlangval chuan a rilruin thildang a ngaihtuah a, Biak in mawi leh ropui tak nei si chawlhni-ah chiah an hmang a, nilai zânah mi tlêmte te ṭawngṭai tûrin an kal leh ṭhin chu mak a ti a. A ṭhianpa hnenah chuan, “Ṭhiana, engatinge hetiang Biak in mawi tak nei si chawlhkar khatah vawi hnih chiah inkhâwm tûr leh ṭawngṭai tura in kal mai le, a uiawm ka ti hle mai. India-ah chuan kan Hindu Temple-ah zing ni chhuah dâwnah leh tlai ni tlâk dâwnin ni tin ṭawngṭai turin kan kal ṭhin a, Mosolman phei chu ni khatah vawi 5 ṭawngṭai turin an kal khâwm ṭhin. Engtin nge Kristian ni tûr hian min beisei theih ang, keini chu nangni aiin kan ṭawngṭai tam a, in Pathian aiin kan Pathian lakah kan inpe zâwk a ni” a ti a.

Biak in hi ṭawngṭai nân te, Pathian fak nân te, ringtute intihchak tawn nân te kan hmang tûr a ni a. A tam thei ang ber kan kal tûr a ni a. A tam thei ang ber kan inkhâwm tûr a lo ni.

JOHANA 4:24
Pathian chu Thlarau a ni; a chibai bûktuten thlarau leh tihtakzetin chibai an bûk tûr a ni,” a ti a.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy