THLARAU RAH – REMNA

EFESI 2:17
A lo kal khân hla taka awm nangni hnênah remna Chanchin Ṭha a hril a, hnai zâwka awm keini hnênah pawh remna Chanchin Ṭha bawk chu a hril a.

Remna hi mihring nunhonaah thil pawimawh tak a ni a. Khawvêl sorkar hrang hrang an inpalai tawn ṭhinna chhan pawh remna a awm theih nân a ni. UNO hial a lo dinna chhan pawh khawvêlah remna leh muanna a awm theih nân a ni.

Bawhchhiatna avânga vân leh khawvêl inrem lo chu Isua Kraws thisen avângin amah nen inremin kan awm a. Hemi avâng hian kan mihring puite nen pawh kan inrem theih a ṭul. Remna tello chuan nupa nunah te, chhûngkaw nunhonaah te, inṭhenawm khawvênna thilah te, rawngbâwlhonaah te, thawhhona leh nunhona hrang hrangah harsatna a awm ṭhin. Mi dangin min rem theih loh pawhin keimahni lam talin kan rem theih a pawimawh. “A theih phawt chuan nangmahni lam tal, mi zawng zawng nên inremin awm rawh u.” (Rom 12:18).