KAIHRUAITU MAMAWH

2 KORINTH 2:14
Nimahsela, Pathian hnênah lâwmthu awm rawh se. Ani chuan Krista zâra hnehtu kawng zawhnaah min hruai zêl a; Krista hriatna rimtui hmun tina lên chhuahtîrtuah min hmang a ni.

Mi tam tak chuan ṭhalaite, ṭhangtharte harsatna tawh hi bâk chi khat (flying fox) nên an tehkhin ṭhin.

Heti hian an sawi ṭhin, khawvêl siamtirh a nih khan bâk thlâwkthei hi a awm a. Ramsa dang zawng zawng chu amah ang vekin a ngai a. Chhûngkaw neih a duh a, ṭhian neih a duh bawk a. Chuvang chuan Sava-te chu chhungkua-ah leh ṭhianah a siam a, an bulah chuan a awm ve ta a.

An in an miau loh avangin Sava pakhat chuan, “Engvangin nge kan kiangah i lo khawsak ve? Keini chu Sava kan ni a, i thlawh ve theih deuh avangin kan zînga tel ve tûrah i inngai ringawt hi a dik lo. Nang chu Sazu i ang a, chuvangin an zîngah chuan awm zâwk rawh” a ti a. Bâk chuan Sava sawi chu dik hlein a hria a. Sazu kiangah chuan a awm ve ta a. Sazute chu a lakah an fel êm êm a. Mahse nikhua a lo rei a, Sazute chu an thlawh ve theih loh avângin awm ho chu harsa an ti a. An kal bosan ta vek mai a.

Bâk chu amah chauhvin a awm ta a. Chuvangin vawiin thlengin a thlâwk kual ta mai mai a ni an ti.

Chu bâk ang chiah chu ṭhalaite hi an ni a, naupang an ni lo va, puitling an ni bawk si lo a. Sava an ni lo a, sazu an ni bawk si lo a; an tân chuan kawng zawh a harsa êm êm a ni. Chung ṭhalaite chuan kaihruaitu an mamawh a, kawngdika ke pên tûrin zirtîrtu an mamawh a ni. Keimahni chuan ke kan pên ve thei mai a, mahse kawng dika ke pên tûr chuan min kaihruaitu tûr kan mamawh vek.

Kawng dika ke pên tûr leh min kaihruai tûrin Lal Isua kan pan a, amah chu kan nghen tlat a pawimawh hle.

MATTHAIA 6:13
Sual tûra thlêmnaah min hruai lût suh la, Mi sual lakah chuan min chhandam zâwk ang che,’ tiin.