HMUINGILNA

HMUINGILNA 1

SAM 1:3
Ani chu tui luang kianga thing phun, A hun têa rah ṭhîn, A hnah pawh uai ngai lo ang hi a ni a; A thiltih apiang chu a hmuingîl zêl ang.

Lal pakhat hian kawng lai takah lung lian tak a dah rup mai a. Kawnga rawn kalte chuan timak an ti êm êm a, Lal chu an dem hlawm hle a ni.

Lal thil tih chu mi dangin hmu ve se dem ve se an ti a, an kal pêl zêl a. A hnuah chuan putar rethei tak pakhat hi a rawn kal a, a thing put lai chu nghatin chu lung chu a dahtu lam demna pawh sawi lovin kawngpui sîra dah tumin a chawi sawn ta nawlh mai a, vânneihthlâk tâkin chu lung hnuaiah chuan lunghlu leh rangkachak leh pawisa tam tak a lo awm reng mai a. Chu putar chuan a han en a, tu ta mah niin a hre lo a, a nei ta hmak mai a. Hlim tak leh hlawhtling inti tak chung chuan a haw ta a ni.

Mi dangte duh loh, ani pawhin a duh vâng ni lovin a rilru ṭhatna leh felna avâng chuan malsawmna a dawng ta a nih chu.

Pathian malsawmna hi kan dawng nasa êm êm a. Kan hmuh theih leh kan hriat theih piah lamah kan hriat loh leh hmuh theih loh lamah pawh nasa takin mal min sawm ṭhîn a ni tih hi hriat tûr a ni. Chu malsawmna chu Pathian ṭhatna leh hmangaihna vâng a nih rualin he khawvêla kan ṭhatna leh mi dangte sawisêl lo a, mi dangte tâna malsawmna kan nih ṭhin avânga kan dawn hi a tam hlê bawk.

Mi dik leh ṭha, rinawm leh taima takte hi engtik ni-ah emaw chuan an la hmuingîl nge nge ṭhîn a ni.

Sam 37:11-ah chuan, ‘Thuhnuairawlhte erawh chuan ram hi an luah ang a, Remna chênin an hmuingîl ang.’ a ti a ni.

THUFINGTE 15:25
Lalpan mi chapo in chu a kar phawng ang a, Hmeithai hmun erawh chu a tinghet ang.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy