ISUAN MIN HMANGAIH

2 KORINTH 5:14
Krista hmangaihna chuan min tîr lui a ni; heti hian kan ngaihtuah: mi zawng zawng thih aiin mi pakhat a thi a; chuvângin, mi zawng zawng chu an thi a ni.

Dr. Karl Barth, Swiss Pathian thu thiam tak chu khawvêl ngaihah pawh Theologian ropui bera ngaih a ni a. A thusawi thiamna mai bakah a lehkhabu ziak tam takte chu zirlai atân an hmang ṭhin a ni.

USA-a Pathian thu zirna hmuna Seminar a neihna-ah an zirlai pakhat chuan zawhna a zâwt a, “Dr. Barth, i rilru-a thil i hriat tawh zawng zawng zîngah eng ber nge thutak nia i hriat?” a ti a.

Zirlai dangte chuan Dr. Barth-a chhânna chu hre châkin an ring an fân a, an beng an hawng a, an ngawi ṭhuap a. Dr. Barth-a chuan aw felfai tak mai hian, “Isua’n min hmangaih ka hria, Bible-in min hrilh si a’ tih hi” tiin a chhâng a.

Isuan min hmangaihna hi a ropui takzet a, chu chuan kan nun a tidanglam ṭhin a, mi nun pawh a tidanglam ṭhin a ni. Min hmangaihna leh khawngaihna avânga kan tâna a thil tih aia inpêkna hi a awm leh thei tawh ngai lo ang. Chuvangin miten Pathian hmangaihna chu an hril zo lo ṭhin a ni.

1 JOHANA 3:16 – ‘Anin kan tân a nun a pêkah hian hmangaihna chu kan hre ta. Keini pawhin unaute tân kan nun kan pe ve tûr a ni.’

JOHANA 15:12 – ‘Hei hi ka thupêk chu a ni; ka hmangaih che u ang hian nangni pawh inhmangaih tawn rawh u.’

ROM 8:35 – ‘Krista hmangaihna ata chu engin nge min ṭhen thei ang? Hrehawmnain emaw, mangannain emaw, tihduhdahnain emaw, ṭâmin emaw, saruaknain emaw, khandaihin emaw min ṭhen thei dâwn em ni?’