ZALENNA

ISAIA 53:5
Nimahsela, ani chu kan bawhchhiatnate avângin hliamin a awm a, kan khawlohnate avângin vuak thitlinin a awm a; kan thlamuanna tûra thununna chu a chungah a tla a, a vuakna vualtea tihdamin kan awm ta.

Khuahkhirhna leh tihduhdahna hnuaia awm chu hrehawm tak a ni a. Tumahin chutianga hringnun hman chu an duh lo ang.

Kum zabi 17-na lai khan Europe mite chuan America-ah awm hmun an khuar a. Chutih lai chuan hnathawktu tûr hi America ramah an duh em em a. Sal tûrin an inhralh a, bâwih an inlei hial ṭhin a ni. A tîrah chuan West Indies mite chu bâwih atân an hmang hmasa ber niin an sawi a. Kum zabi 18 a lo thlen chuan Africa mi, mihângte chu Sal-ah an hmang a, Philadelphia-ah te, Richmond khawpui-ah te, Charleston leh New Orleans-ah te chuan Sal hralhna leh zawrhna Bazar hmunpui a awm hial a ni.

Sal tânna, kut kawl, chain leh hmanraw dangte an hmang nasa êm êm a, nupa an inṭhen a ngai a, naupang duhawm tak tak te chuan enkawltu an nei lo a, a ṭhen phei chu kum tling lovin an chhawr ṭhîn.

Abraham Lincoln-a a rawn President a, bâwih awm tawh lo tûrin hma rawn lain tualchhûng indona a chhuak hial a. Chakna a chang ta a, bâwihte chu tih zalen an ni ta a. Bâwihte tân chuan chu tluka lâwmna nasa leh chhandamna ropui a awm thei lo ang.

Chutiang aia hrehawm leh râpthlâk hnuaiah mihringte hi kan awm a. Mahse Pathian chuan a Fapa Isua Krista hmangin min chhan chhuak a, a fa-ah min vuah leh a, Diabola fa nilovin Pathian fate kan lo ni leh ta a ni.

Kan tâna kraws-a a tuarna te, min hmangaih avânga kan aia a thihna te, sual bâwih ata min chhan chhuak tûra kraws-a khenbeh a nihna te kha thinlungin thlîr ila, Pathian min hmangaihna ropui tak avângin amah chu i fak ang u.

JOHANA 8:36
Chutichuan, Fapain a zalêntîr che u chuan in zalên tak tak tawh ang.