ISUA HMUSIT

SAM 37:1-2
Thil ṭha lo titute avângin intilungngai duh suh la, Fel lo taka tite chu awt hek suh. Hlobet angin ah thlûkin an awm thuai ang a, Hnim hring angin an vuai dâwn si a.

Roman Emperor lâr tak, Julian-a kha Kristiante haw êm êm tu a ni a. Remchang a hmuh phei chuan a tiduhdah thei hle niin an sawi. Persian nêna an indo ṭumin thih ngam khawpa nain hliam a tuar a. Chutia na taka a awm lai chuan a kut aṭanga thisen rawn chhuak chu a kut lehlamah tikaiin a theh darh a, a theh darh rualin “Oh Galilean, Pathianin a hneh ta a che.” a ti a.

A chanchin an sawi leh zêlna-ah chuan Julian-an harsatna a tawn laiin a sipai, amah zuitu pakhat hian Antiokei ringtu pakhat hnênah, “Ṭhiana, thingrem siamtu fapa chuan eng nge a tih a?” tiin a fiam a. Ringtu chuan, “Lei leh vân leh khawvêl siamtu, thingrem siamtu tia i koh nawmnah chuan Emperor Juliana kuang tûr a siam mêk e” tiin a chhâng a. Rei pawh a ni hman lo ang, Julian-a thih thu an hre zui ta nghâl a ni.

MATHAIA 13:54-56-ah khan Lal Isua an tihnawmnah thu kan hmu: ‘An khua chu a lo thleng a, an sunagog-ah chuan anmahni a zirtîr a; tichuan, mak an ti hle a, “He mi hian he finna leh hêng thil mak tihtheihna hi khawi ata nge a hmuh? He mi hi mistiri fapa kha a ni lo vem ni? A nu pawh Mari an tih kha a ni lo vem ni? A unaute pawh Jakoba te, Josefa te, Simona te, Juda te kha an ni lo vem ni? A farnute pawh kan zîngah an awm vek lo vem ni? Hêng zawng zawng hi khawi aṭanga a hriat nge?” an ti a.’

Lal Isua sawichhia-a a thutak uannân hmangtute chu hremin an la awm ngei ang.

THUFINGTE 3:34 – Mi hmusittute chu a hmusit ṭhîn a, Inngaitlâwmte erawh chu khawngaihna a pe ṭhîn.

SAM 34:5
Amah an han en a, an hmêl a hlim ta a, An zak ngai tawh lo vang.