ZAWLNEI DANIELA

DANIELA 1:8
Mahse, Daniela chuan a rilruin lal chaw leh a uain in ṭhinte chuan intihbawlhhlawh loh a tum tlat a; chutichuan, a intihbawlhhlawh loh nân tilrehte hotu chu a dîl a.

Daniela hi Jerusalem tlangvâl, Nebukadnezzaran sala a hruai zînga mi a ni a. A nunah hian entawn tûr tam tak a awm: Pathian a ṭih êm êm a, chu chuan nun dân thianghlimin a nun tîr a. Lal chaw leh uain hmangin a intibawlhhlawh duh lo. Pathian duh dân anga a nun tlat avângin Pathianin finna leh mumang hrilhfiah theihnate a pe a, dinhmun sâng takah hlânkâiin a awm ta a ni.

Ni tin vawi thum khêl lova Jerusalem lam hawia ṭawngṭai ṭhin a nihna hi a entawn tlâk êm êmna a ni a, chu mai ni lovin tih dân mumal leh nun nghet a neih tlatna chuan a nun a kaihruai a. Sakeibaknei pûka an paih dâwn pawhin a ṭawngṭai dân pangngai rengin a ṭawngṭai a. Pathianin a awmpui tlat avângin pûka an thlâk pawhin Sakeibakneite chu a tân blanket lum tak an ni ringawt. Hlauhawmah pawh Lalpa chuan a mite a kalsan ngai lo, a lo thleng hmasa zâwk zêl ṭhin.