ISUA ṬHIANTE

LUKA 14:24
Ka hrilh a che, mi ka sâwmte khân pakhat mahin ka ruaiṭheh an ei lo vang,’ a ti a,” a ti a.

Lal Isuan tehkhin thu a sawi a: Mi hausa deuh mai hi a awm a. Ṭum khat chu a ṭhianṭha te nên ruai ṭheh a tum a. Sâwm hmaih a nei ang tih a hlau êm êm a. Ruai ṭheh ni tûr leh a hun tûrte pawh an hman kim theihna tûrin a ruat fel thlap a. Tichuan a ṭhiante chu a hriattîr ta a, a ṭhianten an hriat chuan an lâwm êm êm a, an vai chuan kal vek pawh an tum a ni.

Mi hausapa chu nasa takin a inbuatsaih a, a in leh a vêl zawng zawngte pawh a chhiahhlawhte a tihfai tîr vek a. Hna an thawk suau suau a, ei siamtute pawh an buai a, a tui thei ang berin an buatsaih a.

A hun a rawn thlen chuan a ṭhiante ko turin a chhiahhlawhte chu a tîrchhuak a. An rawn kîr meuh chuan, “Ka pu, i ṭhiante chuan tih tûr an lo nei a, an rawn kal hman dawn lo” an ti a. A ṭhian a sawm zawng zawngte chu an rawn hman ta lo a.

Mi hausapa chuan, “Chhuak ula, kawtthlêrah te, kâwmkârah te kal thuai thuai la, pachhia te, piangsual te, mitdel te, kebai te hetah rawn hruai lût rawh” a ti a. Chung mite chuan ruai chu an ṭheh ta a, mahse an la ṭheh zo thei lo va, lamliana mi te, dâi-a mite chu an sâwm leh a. Mi rethei tete-ten a sawmna ngai pawimawha hlim taka ruai an ṭheh avângin mi hausapa chu a lâwm ta êm êm a, a sâwmna ngai pawimawh lo tute chungah erawh a thinrim takzet a ni.

Isuan min sâwm reng asin! Kan awm ang angin ani chuan min hmangaih a. A sâwmna chhângtute a hnar ngai lo a, a ṭhiante an ni zâwk ṭhin. Lal Isua’n ka thupêk apiang che u in tih chuan ka ṭhiante in ni ang a ti a. A ṭhiante chu a sâwmna hnar lo va, a thupêkte zawmtute chu an ni.

Johana 15:14
Thu ka pêk apiang che u in tih chuan ka ṭhiante in ni ang.