HMANGCHÂNG (KHAWLAI CHHUAHNAAH)

PHILIPPI 1:27
Eng pawh ni sela, in awm dân chu Krista Chanchin Ṭha nên inmawi phawt rawh se.

Mizo zîngah ina tawm mai mai thei lo tak, address: khawlai tih mai awm kan tam ta hlê. Khawlaia kan lênnah hêngte hi zawm tum hrâm ila –

1. Bawlhhlawh paih mai mai lovin a bâwmah paih zêl a mawi. Motor chângkâng tak chhûng aṭanga thil eina kâwr khawlaia paih chhuah mai maite hi a inhmeh lo. Duhna lai laia zunram thiar mai te hi chîn loh bawk tûr a ni. Khawlai leh kawnga chil chhâk leh hnap hnît mai mai hi chîn loh a ṭha. Vântlang hmun zah thiam hi a mawi. Kuhva ei ṭhinten khawlai leh mi banga an chhâk sen nguai ṭhin leh duh lai laia chinai an tât mai ṭhin hi a mawi lo hlê bawk.

2. Khawlai lênnaa mipa leh hmeichhia inkaia kal kher hi a mawi lo. Hnam dang hmuhsit hlawhna lek a ni. Mihring tamnaah a tlara kal lovin inzui ṭhin a ṭha.

3. Khawlaia mi auh vak vak hi chîn loh a ṭha a, mi dang tâna hnawksak leh bengchheng siam lo zâwnga khawsak ṭhin hi a mawi a, Kristian nih nên a inhmeh.