CHAWLHNA

MATHAIA 11:29
Ka nghâwngkawl bât ula, ka hnênah zir rawh u; thuhnuairawlh tak leh rilru inngaitlâwm tak ka ni si a; tichuan, in thlarau tân chawlhna in hmu ang.

Janie Jolt-i chu kristian nula pangngai tak a ni a. Ram hla takah lehkha zirin College a kal a. Amah chauhva a awm avangin inchhûng chêt leh khawsak vêlah a buai em em lo a. Lehkha zir chu a hna pui ber a ni. Alarm awm Sana ṭha tak mai hi a nuin a present a, chu chu a hmang ṭangkai em em ṭhin a. Nula kawhmawh bâwl lo, nunphung pangngai taka nung, kristian ṭha taka sawi theih ni chiah lo mah se kristian nun pangngai pâwl pha ve tho hi a ni a.

Harsatna erawh a nei a, sual rawngbâwlin a hun te nawmchennân hmang lo mah se a nun hi a hlim hran lem lo va, khawharna, mal ngawih ngawiha inhriatna a nei ṭhin a, thil a ngaihtuah vak vak a, zân pawh a mu ṭha ngai meuh lo a ni.

Vawi khat chu a muthilh vanglai takin a nu alarm pêk chu dar 5:30-ah a rawn ri ral ral mai a. Chutiang hunah alarm a set ngai si lo a, mak a ti êm êm a, zân a mut ṭhat loh avangin a tho peih lo hle a, mahse alarm chu a rîk reng avâng chuan a va off ta nge nge a, mut an tum leh chu a muhil thei ta rêng rêng lo mai a. A tho leh ṭhin a, a khum kotlângah ṭhuin a dawhkân sîra Bible chu a melh rân mai a, vawi tam tak a keu tawh loh anih avangin a paw thak mai a. Bible chu a la a, a hrufai a, a han keu a, chhiar pawh tum em em lo chu a chhiar ta a, a chhiar tui zêl a, dawhkânah uluk takin a zîr ta a.

Tukverh aṭanga zîng ni chhuak êng mawi tak chuan a rawn chhun a, zîng boruak nuam tak hnuaiah a bible chhiar chuan a nun a khawih a. Chumi tûk aṭang chuan zîngah hmâ takah thovin Bible a chhiar a, a ṭawngṭai a, Pathian a pâwl ṭhin a, a nun pawh a rawn hlim chho ta a, a khawhar châng apiangin Bible a zir zawm ta ṭhin a ni.

Ni tina Bible a chhiar leh ṭawngṭai chuan a nun a tidanglama, a thlah phal tawh ngai lo a ni.

Ni tina Bible chhiar leh ṭawngṭai ṭhin chu a nunah hmuh theih leh hriat theihin Krista hmêl a lang ṭhîn.