ZÎNG-MI

EXODUS 16:7
Tin, zîngah pawh Lalpa ropuina chu in hmu dâwn e; Lalpa chunga in phunnawina kha a lo hriat tâk hi. Keinite chu eng nge kan niha, kan chunga in phunnawi mai ni?” an ti a.

Pathianin chhûn leh zân a siam a, an pahnih chuan ṭha a ti êm êm a ni. Chutihrual chuan Pathianin ‘Zîng-mi’ (Morning People) a siam a tih theih ang.

Zîng-mi te chuan zîng chu an chakna hnâr an lâkna hun atân an hmang ber a. Tin, ‘Zân-mi’ (Night People) pawh an awm tho mai. Chûng mite chuan zân hun pawh Pathian tân an hmang ṭangkai ve ṭhin tho a ni. Chutihrual chuan zîng lam hi Pathianin mal a sâwm hlê a ni tih Bible kan chhiar chuan a lang.

Bible-ah chuan zîng taka tho-a Pathian pâwla hna thawk ṭhin mi hrang hrang kan hmu a, an zîngah chuan; Abrahama te, Mosia te, Joshua te, Gideona te, Joba te leh Isua ngei pawh zîng lam mi a ni tih kan hmu.

Exodus 16:7 kan chhiar chuan Pathianin Israel fate hnênah a thiltihtheihna chu zîngah an hmuh tûr thu a hrilh kha. Zîngtin ramtiam Kanan an thlen hma Manna a pe ṭhîn a ni.

Zîngah chuan kan lungngaihna te, kan thinurna te hi a lo bo zo ṭhin a. Sam 30:5-ah chuan ti hian kan hmu, ‘A thinur chu mit khap kâr chauh a ni si a; A duhsaknaah chuan nunna a awm ṭhîn; Ṭahna hi riak tûrin tlai lamah a lo lût thei a, Zîngah erawh chuan hlimna a lo thleng ṭhîn.’ tiin.

Kristiante tâna zîng hun a pawimawh êm êm na chu Lal Isua thawhleh hun kha zîng a nih vâng a ni.

Zîng hun hi kan hmang ṭangkai ve em le? Tlâi taka thovin Pathian pâwl hman lovin thildangah kan hmanhlel ṭhin zâwk em ni? Mizoram-ah chuan Kohhran tin deuh thawin zîng ṭawngṭai inkhâwm an nei a, hemi vâng pawh hi a ni ang; zîng lamah thil ṭha lo leh sual rawngbâwlna ang chi reng reng a thleng ngai lo a ni.

EZEKIELA 12:8
Tin, zîngah chuan Lalpa thu ka hnênah a lo thleng a.