LUNGAWINA

TIRHKOHTE 17:28
Amah avângin kan nung, kan che, kan awm a ni si a; in hla phuah thiam tute emaw pawhin, ‘Keini pawh a thlahte kan ni si,’ tia an sawi ang khân.

Lungawina hi khawvêlin a zawn a ni. TV kan en ṭhin a, kan tâna ṭha lo min kawhhmuhtu ni lovin kan lungawina min siamsak tumin sumdâwngten an thil neih an infaksiak a. Kan beisei kan duh leh mamawh, kan lungawina kim min pêk an tum a ni.

Anih leh chûng kârah chuan lungawina kim nei kan hria em le? Kan lungawi vek em? kan chhûngkua kan lungawi em? kan khawtlâng hi a chhûnga chêngte-ah a lungawi em le?

Chawlh nuam leh lungawithlâk neih tumin hmun nuam leh hotel changkâng takah te kan kal ṭhin a. Ni khat lek emaw, chawlhkâr khat te emaw, thla khat pawh ni se intihhlimna hun hman kan rêl a, kan hmang fo ṭhin bawk. Kan hun hman dânah a hunlai nanana chuan kan lung a âwi ṭhin fo ang. Chûng hun kan hman zawh hnu-ah pawh kan la theihnghilh lo a, kan hre reng a, kan lung a la awi reng thei e. Anih leh kan chawlh a lo zo a, kan nun lo la awm zêl tûrah kan hlim reng tho ang em le?

In nuam tak sak tumin kan tha leh zung, ngaihtuahna leh sum leh pai tam tak kan sêng a. Chûngte chu kan lo nei ta a, hlimna tluantling leh lungawina kim min pe em?

CS Lewis-an a lehkhabu lâr tak, ‘Mere Christianity’ ah chuan ti hian a ziak, “He khawvêlin a pêk theih loh lungawina kim châka ka tui a hâlin, hmu-a ka inhriatna leh chu lungawina ka hmuhna chu khawvêl dang atâna siam ka nihnaah chuan a ni,” a ti.

Ni e, khawvêl dang atâna siam kan ni asin! Lungawina nei tûra nawrna nun hi a na êm êm a, mahse kan lungawina kim chu Pathian thu-ah chauh kan hmu a. Hlimna thurûk, a hmu tawhte lungawina chu i neih theihna turin Lalpan malsawm che rawh se!

SAM 16:11
Nangin nunna kawng chu mi hriattîr ang; I hmaah chuan hlima khah liamna a awm a; I kut ding lamah chuan kumkhaw lâwmna a awm bawk a.