CHANCHIN ṬHA

ROM 1:16
Chanchin Ṭha chu ka zahpui si lo va; tu pawh a ring apiangte tân chhandamna tûra Pathian thiltihtheihna a ni si a; a tîrah Juda mi tân a ni a; tin, Grik mi tân pawh a lo ni leh a.

Chanchin Ṭha tih hi Thuthlung Tharah vawi 119 vêl târlan a ni a. A awmzia chu ‘chanchin lawmawm’, ‘thu lawmawm’, ‘thu ṭha’, ‘chhanchhuahna thu’, ‘hnehsakna thu’, ‘chhandamna thu’, ‘kraws thu’ a ni kan ti thei âwm e. Mihringin keimahni duhthu ngeia Pathian dân kan bawhchhiat avângin thiam lohna leh chhiatnaah kan inbarh lût a. Chuta ṭanga Pathianin a Fapa Isua Krista hmanga min chhanchhuah lehna thu hi a ni.

Chanchin Ṭha hi mi zawng zawng tân a ni a. Sual laka zalenna a ni a, Dân laka zalenna a ni a, Thihna ata zalenna a ni bawk. Chanchin Ṭha hi taksa, rilru leh thlarau chhandamna a ni. Mi lian te, mi ropui te leh mi chapote hnûk hniamtu a ni a, mi rethei leh chanhaite châwisangtu a ni bawk. A dawngtute tâna thih thlamuanna mai ni lovin nun thlamuanna petu a ni. Chanchin Ṭha hian in chhûngkuaah engtiangin nge hna a thawh le?