KRISTA AIA PALAI
2 KORINTH 5:20
Chutichuan, Krista aia palai kan ni a, Pathianin keimahni min hmangin a ngên chiam che u tih theih a ni.
Palai chu mi pahnih emaw pâwl pahnih emaw inkâra remna thu sawi tûra a tîrtu aiawha ding a ni. Palai chu a tîrtu aiawhin a ṭawng a, a tîrtu duh dân tak hlen chhuah chu a tih tûr a ni a. A thiltihin a tîrtu mawi leh mawi loh a hril a, a tîrtu ropuina a keng tel bawk.
Vân leh khawvêl inremna tûra vân palai chu Isua Krista a ni a, a tîrtu a Pa duhzâwng zêlin a nung a, thil a ti ṭhin. Krista aia palai hna kan thawhnaah hian min tîrtu duhzâwnga kan awm ve a pawimawh a. A nih dân tûr dik takin remna Chanchin pawh a mamawhte hnênah kan thlen tûr a ni a. Kan duh dân leh ṭha kan tih dân ang ni lovin min tîrtu duh dân kan hlen a pawimawh. Tin, palaiin a tîrtu ropuina a keng tel ṭhin angin min tîrtu ropuina leh thuneihna te, a thiltihtheihna te keng telin kan târlang ang a. Vân leh khawvêl inrem thu puangin Pathian nêna la inrem lote remtîrin, palai hna kan thawk tûr a ni dâwn lawm ni?
