PATHIAN LEHKHA THU

2 TIMOTHEA 3:16
Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni.

Kristian pakhat, entlang (telescope) siam thiam deuh mai hi a awm a. Ni khat chu a thil siam lai a châwl a, a chawlh hahdam pah chuan Bible a chhiar a, chutia a chhiar lai chuan Arsi chanchin zirmi, mithiam tak hian a rawn bia a, “Ṭhiana, i thil chhiar aṭang khan eng nge thil ṭha i besei a? Kan thil zirna aṭang leh kan thil chhuina zawng zawng aṭangin Bible hi thil hlui, hmâna mi tawh, tunlaia awmze nei tawh lo a ni. A ziaktu pawh i hrechiang ngut em ni?” a rawn ti a.

Entlang siamthiampa chu a ngawi reng a. Arsi chanchin zirmi chu han en pahin, “Vansang Arsi chanchin zirmi, mithiam tak leh hre zau tak i ni a, thil tam tak i chhutna tura i calculator khawl i hman kha i hmang ṭangkai lo’vem ni?” a ti a. Vansang zirmi chuan, “Hmang ṭangkai tehreng e” tiin a chhang a.

Entlang siamtupa chuan, “A siamchhuaktute i hria em?” tiin a zâwt lêt a, arsi zirmi chuan, “Hre kher lo ve, ka hriat a ṭul hleinem,” a ti a.

“A nih leh engngatinge a siamtu hre si lo i hman duh reng tho ni?” a ti a. Ani chuan, “Kan ring a, hna tam tak min thawhsak a ni tih kan hria a lawm,” tiin a chhâng a. Entlang siamtu chuan, “Keini pawh kan Bible hi kan ring a, i calculator-in hna tam tak a thawh sak che angin thil ropui tak tak min tih sak ṭhin a ni,” a ti a.

Hawh u, Bible hi i chhiar tam ang u. Kan ngaihzawngte lehkhathawn leh message kan chhiar châk angin chhiar châk ila, kawng bo loh nâna ram chin/ram lem (Road Map) kan râwn angin râwn ila, kan zirlaibu angin zir ila, sipaiten thupêk an zawm angin a thupêk i zâwm ang u. Entlang siamtu tâna thil ropui tak tihsaktu Bible chuan keini pawh thil ropui tak min tihsak ngei ang.

JAKOBA 4:5
Lehkha Thu-in, “Keimahnia a thlarau a dah hian min duh hliah hliah zia a entîr a ni,” a tih hi a sawi satliah mai niin in ring em ni?