THUHRETU

TIRHKOHTE 1:8
Nimahsela, Thlarau Thianghlim chu in chunga a lo thlen hunah thiltihtheihna in la nei ang; tichuan, Jerusalem khuaah te, Judai leh Samari ram khaw tinah te, kâwlkil thleng pawhin ka thuhretute in ni ang,” a ti a.

‘Thuhretu’ tih hi Krista chanchin an puan avanga an nun hial chânte sawina a ni a. Chuvangin Lal Isuan ‘ka thuhretute in ni ang’ a tih hian hriat satliah a kâwk lo va, Lal Isua chu Chhandamtu a ni ngei e, tih hria a, pawm a, a chhandamna thu puang chhuak zêl a, thih a lo ṭul pawha martar ngam tûrte a sawina niin a lang.

Isua Krista thuhretuah hian kan ṭang ngam tak tak dâwn em? tih hi zawhna pawimawh tak a ni. Ama hming avanga tuar ngam, chân ngam leh rethei ngam tak tak nun a ni tih kan hriat a ṭha âwm e. India ramah ngei pawh Kristian zaa 2.3 vêl chauh kan la awm a. Khawvêl huap pawhin a thim pâwl a tling. Sakhaw mi êm êm ram, mah se thutak pawh si lote hnênah hian thuhretu kan ni ngam dâwn em le!