MAHNI INTHUNUN

1 KORINTH 9:26-27
Chutichuan, tiam chin lam panin ka tlân ngat ngat a ni, boruak mai hnek lovin mahni ka inhnek zâwk ṭhîn a; chu vâng chuan, ka taksa ka tichhel a, ka thuhnuaiah ka dah tawh a ni; chuti lo chuan, mi dangte hnêna ka tlângaupui hnu pawhin, eng emaw tiin keimah ngei hi paih thlâkin ka awm dah ang e.

Tirhkoh Paula hian intihsiak chungchang hi ringtu nun tehkhin nân a hmang fo ṭhin a. Intisiakhote tâna ṭul leh pawimawh êm êm chu mahni inthunun a ni a. An taksa tichak lo thei ruih theih thilte leh zûk leh hmuamte an tih fo chuan hman tlâk loh an ni mai dâwn a ni. Chuvangin anmahnia chak lohna thlen thei laka an inthunun theih a pawimawh ṭhin.

Hetiang bawk hian ringtu chu amah tichak lo thei sual hnathawh lakah a insûm theih a pawimawh a. Thufingin, “Mahni inthunun thei lo chu, khaw kulh bang chim ang hi a ni,” (25:28) a ti a. Inhumhimna nei lo, chhiat tawh mai bâk angin a tehkhin a nih ber chu! Inthunun thei chuan khawvêl a hneh a ni.