HMING ṬHA HLUTNA

JOHANA 17:26
Tin, an hnênah i hming ka hriattîr a, ka hriattîr leh fo vang; nangin kei mi hmangaihna kha anmahniah a awma, kei pawh anmahniah ka awm theihna tûrin,” a ti a.

Vawi khat chu police-ten pa pakhat ipte aṭangin pawisa a rûk avangin misual, rûk hmang an man a. Rûk hmang chuan ei tûr a neih loh avâng te-a thil ru mai ṭhin a nih thu a sawi a. Jail aṭanga a chhuah chiah avângin hna a zawn pawhin tumahin hnathawka an chhawr duh loh avangin hna thawh tûr a neih loh thute a sawi a.

Eng pawh ti dâwn se, a hming a chhiat tawh avângin tumahin an ring lo a, an chhawr duh lo a ni. A pawisa rûksak pa chuan, “A ni maw, ka hming hi kei chuan ka la tichhe lo a, hming hliauna tûr sual lian tak pawh ka la ti lo a, chuvangin ka hming hi ka hawh tîr ang che, uluk takin enkawl la, tichhe reng reng suh ang che,” a ti ta a.

Chu misualpa chuan sumdâwng pa hming chu a pu ta a, a hming avang chuan miten an ring ta a ni.

Kum 15 a liam hnu chuan office assistance chuan a pu hnênah, “Ka pu, mi pakhat, hmêl felfai takin a hmu duh che,” a rawn ti a. A hming a zawh chuan an hming a lo inang reng mai a. Chupa chu office chhûngah chuan a rawn lût a, ti hian a rawn ti a, “Ka pu, tûnah chuan Firm lian tak hotu ka lo ni ta. Kum 15 liamtaah khân i hming min hman tîr a, vawiin thlengin ka tichhe lo va, i hming chu inchherchhuah nân ka hmang a, ka lâwm takzet a ni,” a ti a.

Hming mawi tak leh ṭha tak nei mah ila, Eden huana bawhchhiatna avângin kan sualna leh bawlhhlawhna a bo chuang lo, mahse Lal Isua chuan min hmangaih avângin hming thar, nihna thar duhawm tak min neih tîr a, chu hming thar leh nihna thar chu rinawm taka vawnga enkawltute chuan hlawhtlinna, malsawmna vawiin aṭanga chatuan thlengin an chang dâwn a ni.

HEBRAI 2:12
“Ka unaute hnênah i hming ka lam ang a. Kohhran zîngah i fak hla ka sa ang,” a ti a.