PATHIAN ROPUIZIA

SAM 8:3-4
I vân, i kutchhuakte, Thla leh arsi i ruathote khi, ka ngaihtuah châng chuan, “Mihring hi eng nge maw a niha, i hriat reng ṭhin ni? Mihring fapa pawh hi eng nge maw a niha, i kan ṭhin ni?” ka ti ṭhîn.

Pathian ropuizia kan hria, mahse hriatphâk rual loha ropui a ni si. A ropuina leh thiltihtheihna kan hriat chhunte hian kan nun a tidanglam lo fo ṭhin a, sawi nawn a ngai ṭhin a ni.

Pathian hla satu pawl lâr tak, Petra-a an zaitupa ber, John Schlitt hla phuah, ‘God is too big’ tih-a a thunawnah chuan, “Engmah hian Pathian ropuizia min ti hre chhuak zo lo ve, a thil tum leh thil rêl dân te hi, a chhan chu Pathian chu a ropui êm a ni,” a ti.

Khuai te nun dân hi a mak danglam ve hle a. Anmahni khawpui an din a, an bu-ah chuan pindan chi hrang hrang 109000 chuang an siam thei a. Inthlahchhawnna pindan 12,000 an siam bawk a, an Lalnu ber awmna tûr hmun thianghlim leh chungnung an siam bawk.

Khuai-te chuan boruak awm dân a zirin an bû chu an venghim ṭhin a. Khua a lum chuan an khawizu chu a tuiral mai ang tih an hlauh avangin a tidaitu pâwl (Squad) an siam a, chûngte chuan an bu awngah chuan awmin an thla an zap char char ṭhin a, an colony chu boruak nuam takin an siam ṭhin a ni.

Pâwl dang an awm leh a, chûngte chuan an bu aṭanga Km 10 chhûnga pangpâr zû la tûrin an thawkchhuak reng bawk a ni.

Chutiang chuan awmze nei leh rim takin hna an thawk a. Pathian siam dân an ni. Keini mihringten an khawizu siam chu damdawi-ah te kan lo hmang leh ṭhin a nih hi.

Khuai tereuhte thluakin chutiang chu a tih theih chuan Pathianin kan chunga a rorêl dân leh thil tum avangin tu in nge zawhna pe thei le? Vân kan thlîr a, vuantu leh chelhtu awm lovin Arsi an awm ringawtte hi a va makin a va ropui êm! Pathian thil siam dân a ni e. Amah chu i fak ang u.

SAM 150:6
Engkim, thaw thei tawh phawt chuan Lalpa chu fak rawh se. Lalpa chu fak rawh u.