I RAM LO THLENG RAWH SE

MATTHAIA 6:10
Kan Pa, vâna mi, I hming zahawm rawh se. I ram lo thleng rawh se. I duh zâwng vâna an tih angin leia min ti rawh se.

‘I ram lo thleng rawh se’ tia kan ṭawngṭai hian, ‘Aw Pathian, i lalna, thuneihna leh rorêlna huang chhûngah ka rawn intuklut e’ kan tihna emaw ‘ka thinlungah hian lalna leh thuneihna chang tûrin lo thû ang che’ kan tihna ang deuh a ni a. Pathian duhzâwnga awm tûrin kan inpe tihna a nih chu. A awmzia hriat chian chuan a narâna ṭawngṭai nâna hman ve ngawt ngam chi pawh niin a lang lo.

Mi thiamte chuan Pathian ram hi thleng tawh leh lo la thleng tûr angin an sawi ṭhîn a. He laia Lal Isuan ṭawngṭai dân tûr a zirtîrte a pêkah hi chuan – hun hnuhnung lama Pathian ram a thlen famkimna tûr lam aiin an thinlunga hmun a channa tûr lam zâwnga dîl tûra a sawina niin a rin theih. Kan thinlungah leh kan in chhûngah hian Pathian ram a thleng ve tawh em aw?