REMRUATNA ROPUI

EFESI 1:11-12
Ama remruat ang taka thil engkim tihlawhtlingtu duh dân ang ngeiin Krista zârah a mite ni tûrin keini hi min ruat lâwk a, min thlang chhuak tawh a ni. Keini Kristaa beiseina nghat hmasate hi a ropuina tilangtu tûr kan ni.

Pathian remruatna hnuaia lêng kan ni a, kan tâna ṭha tûrin rem a ruat ṭhin kan ti a, harsatna leh lungngaih mangan kan tawhte hian ani chuan thil tum a nei a, a ropuina tûrin kan chungah a thlen tîr kan ti ṭhin a ni.

Jane Nideth-i chanchinah hian zir tûr kan nei niin a lang. Nu lian tak leh thau tak a ni a, Kg 120 vêl laia rit a ni. A thau êm avangin hriselna lamah harsatna tawh châng a nei fo ṭhîn. In tih chêr tumin ṭan a la ta a, thla 2 chhûng vêl chu a tâwk chiahin chaw a ei a, awmze nei takin exercise a la ṭhin a. Chutianga a tih avang chuan Kg 50 laiin a tla thla ta mai a ni.

A lâwm êm avang chuan a ṭhianṭhate a sâwm a, an inah chuan tlai tin ei leh in neih mumal chungchâng te, exercise lâk mumal ṭhatzia leh hriselna atâna a pawimawhzia an sawi ṭhin a. Chutaṭang chuan anmahni pawhin an zâwm nghâl zêl bawk a.

Miten an lo hre zêl a, pâwl lian tak an lo din ta reng mai a. Vawiinah chuan hriselna kawnga harsatna nei te, thau lutukte leh rit lutukte tâna malsawmna an lo ni thei ta hial a. Khawvêl ram hrang hrang 24 aṭangin kâr tina meeting an neih ṭhin chu miten T.V. aṭangin an lo thlîr a, a hmunah mi tam tak an kal ṭhin bawk a ni.

Jane Nideth-i leh a hote chuan kawng engkimah inenkawl a pawimawh tih hriain naupang aṭanga puitling thlengin inenkawl ṭhatzia chungchâng an zirtîr ṭhin a ni.

Pi Jane-i nun aṭangin eng nge kan zir theih le? A hmaa kan sawi ang khân kan chunga harsatna te hi Pathianin tuar chhuak thei tûrin min ṭanpui a, chu kan chunga a remruat chu a rawng kan bâwl theihna tûr atâna min tah hriamna hmanrua a ni.

Thlarau puihna hmuh fiah thiamte chuan Pi Jane-i angin midangte harsatna hrethiam chungin Pathian rawngbâwlna pawimawh takah kan hmang thei a ni.